ვინ დგას ტერაქტის უკან მოსკოვში

მოკლედ: მოსკოვში მომხდარ ტერაქტზე პასუხისმგებლობა ისლამურმა სახელმწიფომ (ISIS) აიღო.

როგორც BBC-ის რუსულენოვანი ბიურო წერს, ინფორმაცია ამის შესახებ სააგენტომ ISIS Amaq გაავრცელა.
ამასთან, სააგენტოს ინფორმაციით, თავდამსხმელები საკუთარ ბაზებში, მომხდარის შემდეგ, უვნებლად დაბრუნდნენ.

ოფიციალური ინფორმაციით, ამ დროისთვის [23 მარტი, 15:00] ტერაქტის შედეგად 143 ადამიანი დაიღუპა, მათ შორის არიან ბავშვები.

დაღუპულების რაოდენობა, შესაძლოა, გაიზარდოს.
დაშავდა 100-ზე მეტი.

უფრო კონკრეტულად, ვინ შეიძლება ყოფილიყვნენ თავდამსხმელები

ისლამისტურ დაჯგუფებას არ უთქვამს, თუ მისმა რომელმა ფილიალმა განახორციელა თავდასხმა. ორგანიზაციის "საინფორმაციო სააგენტო", როგორც წესი, არ ავრცელებს ასეთ ინფორმაციას.

BBC-ის ექსპერტი ექსტრემისტული ჯგუფების საკითხებში, მინა ალ-ლამი ამბობს, რომ მარტში დაჯგუფებამ გამოაქვეყნა ვიდეო, რომელშიც ჩანს, რომ მამაკაცი, რომელიც, სავარაუდოდ, კავკასიის ვილაიეთიდან იყო, ერთგულებას აღუთქვამს ისლამურ სახელმწიფოს. მოგვიანებით, ეს მამაკაცი, სავარაუდოდ, იყო ერთ-ერთი, რომელიც ინგუშეთში უშიშროების ძალებთან სროლის დროს დაიღუპა.

ამ თემაზე: "კონტრტერორისტულ ოპერაციას" ინგუშეთში 6 ადამიანი ემსხვერპლა — რა ვიცით

აშშ-ის ხელისუფლება კი მიიჩნევს, რომ გუშინ მოსკოვში მომხდარი თავდასხმის უკან, შესაძლოა, ISIS-ის ავღანური დაჯგუფება, ვილაიეთ ხორასანი იდგეს.

აღსანიშნავია, რომ ეფ-ეს-ბეს დირექტორმა, ალექსანდრ ბორტნიკოვმა თქვა, რომ ვილაიათ ხორასანი "ზრდის საკუთარ პოტენციალს, რაც, დროთა განმავლობაში, საშუალებას მისცემს მას გადავიდეს ტერორისტული თავდასხმების განხორციელებაზე ავღანეთის ფარგლებს გარეთ“.
თუმცა რატომღაც, როდესაც შეერთებულმა შტატებმა გააფრთხილა რუსეთი შესაძლო თავდასხმის შესახებ, ვლადიმირ პუტინმა ამ განცხადებას "პირდაპირი შანტაჟი" უწოდა, რომლის მიზანი იყო "საზოგადოების დაშინება და დესტაბილიზაცია".

სოციალურ ქსელში ვრცელდება თეთრი რენოს მარკის მანქანის ფოტო, რომელსაც, სავარაუდოდ, დაზვერვის სამსახურები ეძებენ.

სამთავრობო რია ნოვოსტი წერს, რომ დამნაშავეები, შესაძლოა, სწორედ ამ მანქანით მიმალულიყვნენ და ფოტოსაც აქვეყნებს.

კიდევ რამდენიმე რუსული მედიასაშუალება ამტკიცებს, რომ ძალოვნები მეორე მანქანასაც ეძებენ, რუხი ფერის Renault Fluence-ს.

ბოლო ხაზი: მოსკოვში, საკონცერტო დარბაზ კროკუს სითი ჰოლში, სადაც ჯგუფ პიკნიკის კონცერტი მიმდინარეობდა, შეიარაღებულმა პირებმა ცეცხლი გახსნეს, შემდეგ კი ყუმბარები ისროლეს.