ექვსი ადამიანი დაიღუპა შაბათს ინგუშეთში, სროლის შედეგად. ინციდენტს ადგილობრივმა ხელისუფლებამ "კონტრტერორისტული ოპერაცია" უწოდა.

მიუხედავად იმისა, რომ ინგუშეთის ლიდერი, მაჰმუდ-ალი კალიმატოვი ამბობდა, რომ სროლის შედეგად მხოლოდ "ბოევიკები“ დაიღუპნენ, ადგილობრივი საინფორმაციო ტელეგრამ არხი ბაზა კვირას წერდა, რომ ექვსიდან ერთი დაღუპული მშვიდობიანი მოქალაქე იყო. მათივე თქმით, დაშავდა სამი სამართალდამცველიც.

ადგილობრივმა ტელეგრამ არხებმა შაბათს საღამოს გაავრცელეს ინფორმაცია, რომ ინგუშეთის ქალაქ კარაბულაკში სროლის ხმა ისმოდა.

შაბათს ღამით კალიმატოვმა ტელეგრამზე დაწერა, რომ ქალაქში, ოთხ ქუჩაზე კონტრტერორისტული ოპერაცია მიმდინარეობდა და აღნიშნა, რომ სიტუაცია "სამართალდამცავი ორგანოების კონტროლის ქვეშ იყო".

კვირას, რუსეთის ეროვნულმა ანტიტერორისტულმა კომიტეტმა გამოაცხადა, რომ ინგუშეთის უსაფრთხოების ძალებმა, საცხოვრებელ კორპუსში ალყა შემოარტყეს "ექვს ბანდიტს", მათი თქმით, ისინი "ისლამური სახელმწიფოს" ტერორისტები იყვნენ. მათივე ინფორმაციით, ჯგუფი მონაწილეობდა თავდასხმაში საგზაო პოლიციის განყოფილებაზე და ასევე, ცეცხლსასროლი იარაღით დაუპირისპირდნენ პოლიციას, 2023 წლის მარტსა და აპრილში, რის შედეგადაც სამი ოფიცერი დაიღუპა.

ახლომდებარე ბინებიდან მაცხოვრებლები გამოიყვანეს. ადგილობრივი ტელეგრამ არხის, Mash Gor-ის ინფორმაციით, ევაკუირებულები დროებით ახლომდებარე სკოლას შეაფარეს.

ანტიტერორისტულმა კომიტეტმა თქვა, რომ მას შემდეგ, რაც სამართალდამცველებმა მათი დაკავება სცადეს, დაჯგუფების წევრებმა ცეცხლი გახსნეს. შედეგად, გაჩნდა ხანძარი. ექვსივე პირი "ნეიტრალიზებულია".

კომიტეტი, ასევე, ამბობს, რომ სროლის ადგილზე იპოვეს ავტომატური იარაღი, ტყვია-წამალი, ხელყუმბარები და თვითნაკეთი ასაფეთქებელი მოწყობილობები.

ადგილობრივი ტელეგრამის არხები და მედია იუწყებიან, რომ უსაფრთხოების ძალებსა და ბოევიკებს შორის შეიარაღებული დაპირისპირება რამდენიმე საათის განმავლობაში გაგრძელდა, სროლა მხოლოდ დილით შეწყდა.

ბაზა წერს, რომ "უსაფრთხოების ოფიციალური პირების“ თანახმად, ჯგუფი „რუსეთის ტერიტორიაზე ტერორისტული თავდასხმების სერიას“ გეგმავდა და შესაძლოა, მათ მონაწილეობა ჰქონოდათ მიღებული პოლიციელებზე განხორციელებულ თავდასხმებში.

კვირას, დილით, ინგუშეთის ჯანდაცვის სამინისტრომ განაცხადა, რომ ცნობები მშვიდობიანი მოსახლეობის დაღუპვის, ან დაშავების შესახებ "ყალბი" იყო.

ინგუშეთის ხელმძღვანელმა, ასევე, დაადასტურა, რომ მსხვერპლი არ ყოფილა არც სამართალდამცავებსა და არც მოსახლეობას შორის და რომ კონტრტერორისტული ოპერაციის რეჟიმი უკვე გაუქმებულია.

საინფორმაციო სააგენტო "იზვესტია“ საკუთარ წყაროებზე დაყრდნობით იტყობინება, რომ შაბათს დაღუპულები არიან — ამირხან გურაჟევი, ზელიმხან ცუროევი, თაგირ ცუროევი, ბერს ჩემურზიევი, მიქაილ ტუტაევი და მაგომეტ ბარკინხოევი.

ადგილობრივი მედია გამოცემა Fortanga წერს, რომ ზელიმხან ცუროევი და თაგირ ცუროევი ტერორიზმის ხელშეწყობის ბრალდებით იძებნებოდნენ.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.