რა ხდება: რუსული სახელმწიფო დუმის დეპუტატის, სერგეი კოლუნოვის თქმით, რუსეთის სკოლების მუსიკალურ პროგრამაში შევა ოლეგ გაზმანოვის, ჯგუფ "ლიუბეს", არტისტ "შამანის" და სხვა მუსიკოსების "პატრიოტული" სიმღერები.

დეტალები: "განათლების სამინისტრომ მხარი დაუჭირა ჩემს ინიციატივას, რომ თანამედროვე პატრიოტული კომპოზიციების შესწავლა სასკოლო მუსიკის გაკვეთილების კურიკულუმში ჩავრთოთ,” — თქვა კოლუნოვმა.

  • მისი თქმით, ახლა ექსპერტებთან და მშობლებთან ერთად შეიმუშავებს ასეთი შემსრულებლებისა და კომპოზიციების სიას. მათ შორის აუცილებლად იქნებიან "ლიუბე“, გაზმანოვი და შამანი.

ამ ინიციატივის შესახებ კოლუნოვს აქამდეც უსაუბრია. მან თქვა, რომ "პატრიოტული სიმღერები რუს ბავშვებს სამშობლოს სიყვარულს და სიამაყის გრძნობას გაუმძაფრებს".

ასევე, ნახეთ : პუტინის ფონდიდან მილიონობით რუბლი გამოიყო რუსულის პოპულარიზაციისთვის დსთ-ში, გაზმანოვისთვის და ჯარისკაცების პროთეზირებისთვის

პროპაგანდა რუსულ სკოლებში

მანამდე, დუმის დეპუტატმა, იანა ლანტრატოვამ გამოთქვა ინიციატივა, რუსულ სკოლებში 24 თებერვალი აღინიშნოს, როგორც უკრაინაში რუსეთის შეჭრის დღე.

  • კერძოდ, დეპუტატი საჭიროდ მიიჩნევს ამ დღისთვის სკოლის მასშტაბით ღონისძიებების პროგრამის შემუშავებას და მას ოფიციალურად "სპეციალური სამხედრო ოპერაციის დაწყების დღე“ უნდა ეწოდოს.
  • ლანტრატოვას გეგმის მიხედვით, 24 თებერვალს სამხედრო მოსამსახურეები სკოლაში უნდა მიიწვიონ, ან — ბავშვებს აჩვენონ ომის შესახებ ვიდეოები.
  • კლასში მოსწავლეებს უნდა მოუყვნენ "სპეციალური სამხედრო ოპერაციის“ ისტორია, მისი მიზეზების, მიზნებისა და ამოცანების შესახებ.
  • როგორც ლანტრატოვამ აღნიშნა, ომი არის "მნიშვნელოვანი მოვლენა თანამედროვე რუსეთში, რომელიც გავლენას ახდენს საზოგადოების განვითარების ყველა სფეროზე“.

2022 წლის სექტემბრიდან რუსულ სკოლებში ტარდება პროპაგანდისტული გაკვეთილები "საუბარი მნიშვნელოვან საკითხებზე".

  • განათლების სამინისტროს დადგენილებაში აღნიშნულია, რომ ეს აუცილებელია "სკოლის მოსწავლეებში სამშობლოს სიყვარულის, სამშობლოსადმი სიამაყის, პატრიოტიზმის ჩამოყალიბებისთვის“.
  • მიუხედავად იმისა, რომ გაკვეთილები არ არის საგანმანათლებლო პროგრამის ნაწილი, მშობლები ამბობენ, რომ მათ შვილებს გარიცხვით ემუქრებიან, თუ უარს იტყვიან დასწრებაზე.

მსგავსი: როგორ ცდილობს რუსეთი დაგაჯეროთ, რომ უკრაინას "ათავისუფლებს"