რა ხდება: 2024 წლის 12 მარტს, სამშაბათს, რუსეთის საპრეზიდენტო არჩევნებამდე დღეებით ადრე, რუსეთის მოქმედი პრეზიდენტისა და ასევე, საპრეზიდენტო კანდიდატის, ვლადიმერ პუტინის მხარდამჭერი აქცია-კონცერტი გამართეს რუსეთის მიერ ოკუპირებულ ცხინვალში.

  • არსებული ინფორმაციით, პუტინის მხარდასაჭერად ცხინვალის მთავარ მოედანზე ხუთი ათასზე მეტი მოქალაქე მიიყვანეს.

  • აქციაზე, პუტინის მხარდასაჭერად შეკრიბეს ე.წ. "სახელმწიფო ორგანიზაციების" წარმომადგენლები, რომლებსაც, უარის შემთხვევაში, სამსახურიდან გათავისუფლების ეშინიათ, — იუწყება ადგილობრივი ტელეგრამ-არხი.

  • შეკრებას ორგანიზება პარტია ნიხასის ლიდერმა, ზიტა ბესაევამ გაუწია.

დეტალები: აქცია-კონცერტზე იყო ლოზუნგები: "რუსეთი — ოსეთი", "პუტინის გამარჯვება — ოსეთის გამარჯვება!", "ძლიერი პრეზიდენტი — ძლიერი რუსეთი".

გზავნილები ცხინვალიდან — კრემლს: "რუსეთი, ჩვენი უსაფრთხოების მნიშვნელოვანი გარანტორია, ის არის სტრატეგიული პარტნიორი, რომელიც ყოველთვის მხარს უჭერს სამხრეთ ოსეთს", — განაცხადა პარტია ნიხასის ლიდერმა, ზიტა ბესაევამ ვლადიმერ პუტინის მხარდასაჭერ აქციაზე.

  • ბესაევის თქმით, ცხინვალისთვის მნიშვნელოვანია სტაბილურობა რუსეთში: "ჩვენ გვესმის და ვიცით, რამდენად მნიშვნელოვანია ახლა რუსეთის მხარდაჭერა, ვლადიმერ პუტინის მხარდაჭერა. სამხრეთ ოსეთის მოქალაქეების უმეტესობა რუსეთის მოქალაქეა", — თქვა მან და მადლობა გადაუხადა რუსეთს, "რომელმაც სამხრეთ ოსეთს დამოუკიდებელ სახელმწიფოში ცხოვრების შესაძლებლობა მისცა".

ფართო სურათში: რუსეთის საპრეზიდენტო არჩევნებზე ვლადიმერ პუტინის მხარდაჭერისთვის მოუწოდებს მოსახლეობას რუსეთის მიერ საქართველოს კიდევ ერთი ოკუპირებული რეგიონის, აფხაზეთის ე.წ. პრეზიდენტი, ასლან ბჟანია.

  • ბჟანია მიიჩნევს, რომ ეს იქნება "აფხაზეთისთვის შესაძლებლობა, გამოხატოს მადლიერება".

  • რუსეთის საპრეზიდენტო არჩევნები ოკუპირებულ აფხაზეთში 17 მარტს გაიმართება.

  • მასში მონაწილეობის მიღებას შეძლებენ რუსეთის მოქალაქეები, რომლებიც ცხოვრობენ, ან დროებით იმყოფებიან აფხაზეთის ტერიტორიაზე.

  • რუსეთის საპრეზიდენტო არჩევნები 15-17 მარტს გაიმართება.

გაიგე მეტი — ბლუმბერგი: რუსეთის მთავრობაში მნიშვნელოვანი ცვლილებები იქნება საპრეზიდენტო არჩევნების შემდეგ