12 და 13 აპრილს, თბილისში — საქართველოში სპორტული თხრობის პირველი ფესტივალი გაიმართება — ბილეთების გაყიდვა უკვე დაიწყო.

ევროპოპის ორგანიზებული 2-დღიანი ღონისძიება, Tales of Play, რომელიც კოკა-კოლას ყოფილი ქარხნის ტერიტორიაზე გაიმართება, თავისი მასშტაბით რეგიონალური მნიშვნელობის ტრიბუნაა, სადაც დიდი სპორტის შემქმნელი ადამიანების გზები გადაიკვეთება.

ამ სპორტულ თავგადასავალში ჟურნალისტიკის წამყვან პროფესიონალებს, აღიარებულ ექსპერტებს, მენეჯერებს, მსაჯებსა თუ ლეგენდარულ მოთამაშეებს ვიხილავთ. ევროპოპის სცენიდან ისინი დაგროვილ გამოცდილებას გაგვიზიარებენ და ფესტივალის სტუმრებს მოუთხრობენ ამბებს, რომლებიც ხშირად სპორტის გულშემატკივრისთვის უცნობად რჩება, ქართულ აუდიტორიამდე კი რთულად ან საერთოდ ვერ აღწევს.

მიუხედავად იმისა, რომ Tales of Play წელს პირველად ტარდება, სტუმრების სია სავსეა სპორტის ნებისმიერი გულშემატკივრისთვის ნაცნობი სახელებით. ფესტივალის ერთ-ერთი გამორჩეული სტუმარი ლეგენდარული კლარენს ზეედორფია — ერთადერთი ფეხბურთელი ისტორიაში, რომელსაც ჩემპიონთა ლიგა სამი სხვადასხვა გუნდის მაისურით ვან გაალის აიაქსით, ჰაინკესის რეალითა და ანჩელოტის მილანით აქვს მოგებული.

ვარსკვლავური სტუმრების გარდა, არანაკლებ მნიშვნელოვანია თავად ღონისძიების ფორმატიც: ინდივიდუალური გამოსვლებით, Q&A-ით, პანელური დისკუსიებით, ნეტვორქინგითა და ფილმის ჩვენებით.

ორგანიზატორებს სურთ, რომ სპორტული თხრობის ფორუმს ყოველწლიური ხასიათი ჰქონდეს — ევროპოპის სცენა ჩამოყალიბდეს ადგილად, რომელიც სპორტის ფანებსა და პროფესიონალებს მომავალშიც არაერთხელ მისცემს ერთად შეკრების, გამოცდილებების გაზიარების, სპორტული ამბების თხრობის საშუალებას.

ფესტივალი 12 აპრილს, 18:00 საათზე დაიწყება; მისი მეორე ნაწილი კი უკვე 13 აპრილს, დღის პირველი ნახევრიდან გაგრძელდება.

ევროპოპ ფორუმის Ბილეთის შეძენა უკვე შესაძლებელია TKT.GE-ზე და მისი ღირებულება 175 ლარია.