მოკლედ: საქართველოს პარლამენტის თავმჯდომარე შალვა პაპუაშვილმა ქართულ საზოგადოებაზე "კარგად ორგანიზებული და კოორდინირებული დეზინფორმაციული შტურმი" უწოდა 2023 წლის 7-8 მარტის აქციებს, სადაც საზოგადოება პარლამენტის წინ რუსულ კანონს აპროტესტებდა, სამართალდამცავებმა კი ისინი რამდენჯერმე დაშალეს წყლის ჭავლის, წიწაკის სპრეისა და ცრემლსადენი გაზის გამოყენებით.

  • "გავიდა დრო და ქართული საზოგადოება დარწმუნდა, რომ მაშინ მწარედ მოატყუეს", — განაცხადა პაპუაშვილმა 7 მარტს, აქციებიდან ერთი წლის თავზე.

დეტალები: პაპუაშვილის თქმით, მარტში "აჯანყდნენ" ის პარტიები და არასამთავრობო ორგანიზაციები, რომლებიც გაუმჭვირვალედ იღებენ უცხოურ დაფინანსებას.

მისივე თქმით, "ერთი წლის თავზე, გვაქვს უფრო მეტი შედეგი, ვიდრე ამ კანონით მიაღწევდა ქართული საზოგადოება, რადგან უფრო მეტი ვიცით ამ პარტიებსა და ორგანიზაციებზე, იმ სქემებზე, როგორ ფინანსდებიან, ვხედავთ დონორების აღიარებას, რომ პარტიები არ უნდა ფინანსდებოდეს, ეს არის შედეგი, რომელსაც მიაღწია ქართველმა ხალხმა".

  • "პირველად საქართველოს ისტორიაში, ვიხილეთ, რომ მოლოტოვის კოქტეილით წვავდნენ ადამიანს და ეს მოხდა პირველად და ეს მოხდა ევროპის სახელით".
  • "ეს არის ანტიევროპული განწყობების გაღვივება, როცა ვხედავთ, რომ ხდება გმირად აღიარება მათი, ვინც წვავდა ადამიანებს, მანქანებს პარლამენტთან, ეს არის ის, რასაც უნდა გაემიჯნოს ყველა ჭეშმარიტი ევროპელი",— თქვა პაპუაშვილმა.

მსგავსი: პარლამენტის თავმჯდომარე ისევ რუსულ კანონს იცავს და სტრატეგიულ პარტნიორებს "რადიკალიზმის ალაგმვაზე" აკისრებს პასუხისმგებლობას

ბოლო ხაზი: 2023 წლის 7-8 მარტს საზოგადოება პარლამენტის წინ რუსულ კანონს აპროტესტებდა. სამართალდამცველებმა შეკრებილები რამდენჯერმე დაშალეს წყლის ჭავლის, წიწაკის სპრეისა და ცრემლსადენი გაზის გამოყენებით, სცემდნენ და აკავებდნენ პროტესტის მონაწილეებს.

  • აქციის მონაწილე, ლაზარე გრიგორიადისი პოლიციამ 2023 წლის 29 მარტს დააკავა, 31 მარტს კი სასამართლომ პატიმრობა შეუფარდა.
  • გამოძიების ვერსიით, გრიგორიადისმა პოლიციის თანამშრომლებს ქვები და ე.წ. მოლოტოვის კოქტეილები ესროლა, ასევე, ცეცხლი წაუკიდა შსს-ის კუთვნილ ავტომობილს.
  • ლაზარე გრიგორიადისის დასკვნითი სასამართლო პროცესი, 28 მარტს, თბილისის საქალაქო სასამართლოშია ჩანიშნული.

ამ თემაზე: ერთადერთ ნათელ წერტილად და იმედად პრეზიდენტი ზურაბიშვილი გვრჩება — ლაზარეს დედა