ქართველმა მსახიობმა ეკა ჩავლეიშვილმა მორიგი აღიარება დუბლინის საერთაშორისო კინოფესტივალზე მოიპოვა. ნომინაციაში საუკეთესო მსახიობი ქალი, მაყურებლისა და დუბლინის კინოკრიტიკოსთა წრის რჩეული ჩავლეიშვილი გახდა, ელენე ნავერიანის ფილმისთვის შაშვი შაშვი მაყვალი.

აღნიშნულ ფილმში მთავარი როლის შესრულებისთვის, ეკა ჩავლეიშვილს კიდევ არაერთი სხვა საერთაშორისო ჯილდო აქვს მიღებული, მათ შორის, სარაევოს, ბელფასტისა და კოტბუსის კინოფესტივალებზე. მსახიობი ასევე წარდგენილი იყო ევროპული კინოაკადემიის ჯილდოზე.

ჩავლეიშვილთან ერთად, ჯილდოები არც თავად ფილმს მოჰკლებია. შაშვი შაშვი მაყვალი სარაევოსა და მიშკოლცის საერთაშორისო ფესტივალების მთავარი პრიზიორი გახდა. ნავერიანის ფილმი კანის კინოფესტივალის დამოუკიდებელ სექციაშიც აღმოჩნდა.

ფოტო: Directors Fortnight

შაშვი შაშვი მაყვალი ელენე ნავერიანისთვის მესამე სრულმეტრაჟიანი ფილმია. კინოსურათი თამთა მელაშვილის ამავე სახელწოდების ბესტსელერი რომანის ეკრანიზაცია გახლავთ. ამბავი პატარა ტრადიციულ ქართულ სოფელში მცხოვრებ, შუახნის ასაკის დაუქორწინებელ ქალ ეთეროზე გვიყვება. ეთეროს რუტინად ქცეულ ყოველდღიურობას ერთხელაც ჯერ უსიამოვნო ინციდენტი, მერე კი მოულოდნელად მიღებული გადაწყვეტილება ცვლის. მელაშვილის წიგნმა 2021 წელს პრემია საბაც მიიღო წლის საუკეთესო რომანის ნომინაციაში. ნაწარმოების მიხედვით ზუგდიდის შალვა დადიანის სახელობის პროფესიულ სახელმწიფო დრამატულ თეატრში დაიდგა სპექტაკლიც.

რაც შეეხება ელენე ნავერიანს, შაშვი შაშვი მაყვლის ეკრანიზაციამდე მას გადაღებული აქვს ფილმები მე მზის წვეთი ვარ დედამიწაზე და სველი ქვიშა, რომლებმაც ასევე დაიმსახურეს საერთაშორისო აღიარება.

თუ ფილმები შენი ცხოვრების განუყოფელი ნაწილია და მათი განხილვაც გიყვარს, შემოგვიერთდი ჯგუფში ერთი ფილმიც და...