სომხეთის პარლამენტის თავმჯდომარემ, ალენ სიმონიანმა განაცხადა, რომ სომხეთი "აუცილებლად“ უნდა გახდეს ევროკავშირის წევრი.

"ჩვენ მზად ვართ და მივიწევთ იმ მიმართულებით, რომელიც უზრუნველყოფს მაქსიმალურ უსაფრთხოებას. დღეს დემოკრატია, დემოკრატიულ ქვეყნად ყოფნა, შეიძლება ითქვას, რომ ჩვენი ყველაზე დიდი უსაფრთხოების სისტემაა”, — განაცხადა სიმონიანმა.

მას არ უთქვამს, შეიტანს თუ არა სომხეთი ოფიციალურ განაცხადს ევროკავშირის წევრობაზე. რუსეთთან ურთიერთობის გაუარესების ფონზე, ქვეყანა ცდილობს ჰქონდეს უფრო მჭიდრო დიპლომატიური და უსაფრთხოებასთან დაკავშირებული კავშირები ევროპასთან და დასავლეთთან.

გასულ თვეში ევროკავშირმა განაცხადა, რომ იწყებს "ამბიციური“ პარტნიორობის დღის წესრიგს სომხეთთან, რაც მოიცავს ვიზალიბერალიზაციას, ვაჭრობას და უსაფრთხოების თანამშრომლობას. 2023 წლის ოქტომბერში პრემიერ-მინისტრმა ნიკოლ ფაშინიანმა განუცხადა ევროპარლამენტს, რომ სომხეთი მზად არის უფრო ახლოს იყოს ევროკავშირთან, "რამდენადაც ევროკავშირი ამას შესაძლებლად მიიჩნევს“.

ბრიფინგზე სიმონიანმა, ასევე, გააკრიტიკა კოლექტიური უსაფრთხოების ხელშეკრულების ორგანიზაცია (CSTO), რუსეთის ეგიდით შექმნილი უსაფრთხოების ბლოკი, რომლის წევრიც არის სომხეთი. სიმონიანმა თქვა, რომ ეს არის ორგანიზაცია, რომელიც "არ მუშაობს".

მის განცხადებამდე ერთი კვირით ადრე, ფაშინიანმა France 24-ს უთხრა, რომ სომხეთმა "გაყინა“ მონაწილეობა CSTO-ში იმის გამო, რომ ორგანიზაციამ უარი თქვა სომხეთის დაცვაზე, საზღვარზე აზერბაიჯანის თავდასხმებისგან.

მიუხედავად იმისა, რომ სომხეთმა ორგანიზაცია ფორმალურად არ დატოვა, სიმონიანმა არ გამორიცხა, რომ ქვეყანა გამოვა CSTO-დან, რადგან "ადგილი ჰქონდა ათზე მეტ ეპიზოდს, რომლის მიხედვითაც აშკარა გახდა, რომ ჩვენი მოკავშირე არ გვეხმარება“.

სომხეთი, ბოლო პერიოდში, დივერსიფიკაციას უკეთებს უსაფრთხოების პარტნიორებს, ყიდულობს იარაღსა და თავდაცვის სისტემებს საფრანგეთისგან და ინდოეთისგან.

სიმონიანმა, ასევე, დაადანაშაულა რუსეთი თურქეთთან და აზერბაიჯანთან თანამშრომლობაში და თქვა, რომ შესაძლოა, ეს სამი ქვეყანა სამხედრო მოქმედებაზე 2020 წლის ომამდე შეთანხმდა.

მან თქვა, რომ არსებობს შანსი, კიდევ მოხდეს წინასწარ კოორდინირებული ესკალაცია.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.