მოკლედ: ალექსეი ნავალნის პარასკევს მოსკოვში დაკრძალავენ.

  • ინფორმაცია მისმა პრესმდივანმა, კირა იარმიშმა დაადასტურა.

დეტალები: იარმიშის თქმით, პანაშვიდი 1 მარტს, 14:00 საათზე, მოსკოვში, მარინოს ღვთისმშობლის ხატის სახელობის ტაძარში ჩატარდება.

  • პოლიტიკოსს ბორისოვის სასაფლაოზე დაკრძალავენ.
  • სამშაბათს, 27 თებერვალს, ოპოზიციის ლიდერის პრესსპიკერმა თქვა, რომ გაუჭირდათ დარბაზის შოვნა, სადაც ნავალნის პანაშვიდი გაიმართებოდა.

ამ თემაზე: "თუ გაქვთ შესაფერისი ადგილი, გთხოვთ, დაგვიკავშირდეთ" — ნავალნის გარემოცვა სამოქალაქო პანაშვიდისთვის ადგილს ეძებს

ნავალნის გუნდს დაკრძალვა 29 თებერვალს სურდა, თუმცა, ნავალნის ფონდის დირექტორის, ივან ჟდანოვის თქმით, "მალე გახდა ცნობილი, რომ ვერ იპოვიდნენ ერთ ადამიანსაც კი, ვინც ამ დღეს საფლავს გათხრიდა".

  • ჟდანოვის განმარტებით, ამისი მიზეზი არის ის, რომ ვლადიმირ პუტინის ყოველწლიური გამოსვლა ფედერალური ასამბლეის წინაშე სწორედ 29 თებერვალს არის დაგეგმილი.
  • "კრემლს ესმის, რომ არავის ეცლება პუტინისა და მისი მიმართვისთვის, ნავალნის დაკრძალვის დღეს", — დაწერა ჟდანოვმა.

ბოლო ხაზი: ალექსეი ნავალნი ციხეში 2024 წლის 16 თებერვალს გარდაიცვალა.

  • წლების განმავლობაში ის პრეზიდენტის, ვლადიმირ პუტინისთვის ყველაზე სერიოზული ოპონენტი იყო.
  • მისმა ცოლმა, იულია ნავალნაიამ და ასევე, მსოფლიო ლიდერების ნაწილმა, პოლიტიკოსის გარდაცვალებაში პუტინი პირდაპირ დაადანაშაულა.

მსგავსი: ვინ არის იულია ნავალნაია, პუტინის ახალი მტერი