მოკლედ: რუსი ოპოზიციონერი პოლიტიკოსის, ალექსეი ნავალნის სამოქალაქო პანაშვიდი ამ კვირის ბოლომდე, 1-ელ მარტამდე იგეგმება.

  • ამის შესახებ ალექსეი ნავალნის პრესმდივანი კირა იარმიში X-ზე წერს.

დეტალები: "ჩვენ ვეძებთ დარბაზს ალექსეის საჯარო გამომშვიდობებისთვის. თუ გაქვთ შესაფერისი ადგილი, გთხოვთ, დაგვიკავშირდეთ", — წერს იარმიში.

მსგავსი: ნავალნი რამდენიმე დღეში უნდა გათავისუფლებულიყო, მას ხანგოშვილის მკვლელზე ცვლიდნენ — მარია პევჩიხი

კონტექსტი: ალექსეი ნავალნის ცხედარი ოჯახს 24 თებერვალს, პოლიტიკოსის გარდაცვალებიდან მხოლოდ მე-9 დღეს გადაეცა.

  • 23 თებერვალს, რუსეთის სახელმწიფო გამომძიებლებმა ალექსეი ნავალნის დედას ულტიმატუმი წაუყენეს — თუ ლუდმილა ნავალნაია სამი საათის განმავლობაში არ დათანხმდებოდა შვილის საიდუმლოდ დაკრძალვას, პოლიტიკოსს იმ ციხეში დაკრძალავდნენ, სადაც გარდაიცვალა.
  • ლუდმილა ნავალნაიამ უარი თქვა საგამოძიებო კომიტეტის ამ ულტიმატუმის შესრულებაზე.
  • ალექსეი ნავალნის დედა მოითხოვდა, გათვალისწინებული ყოფილიყო კანონით დადგენილი ნორმა, რომლის მიხედვით, გარდაცვალების მიზეზის დადგენიდან 2 დღის ვადაში, ცხედარი ოჯახს უნდა გადაეცეს.
  • 26 თებერვალს, რუსეთის პრეზიდენტის პრესმდივანმა, დიმიტრი პესკოვმა განაცხადა, რომ კრემლი არ ახდენდა ზეწოლას ალექსეი ნავალნის დედაზე. გარდა ამისა, პესკოვის თქმით, პრეზიდენტ ვლადიმერ პუტინს არ მიუღია გადაწყვეტილება ცხედრის ექსტრადიციის შესახებ, რადგან "სახელმწიფოს მეთაური ამ საკითხებს არანაირად არ არეგულირებს".

მსგავსი: "პუტინი 9 დღეა მძევლად ატარებს ჩემი ქმრის ცხედარს" — იულია ნავალნაია

ბოლო ხაზი: 2024 წლის 16 თებერვალს რუსეთის ფედერალური სასჯელაღსრულების სამსახურმა გაავრცელა ცნობა, რომ ოპოზიციონერი პოლიტიკოსი, ალექსეი ნავალნი სპეციალური რეჟიმის კოლონიაში გასეირნების შემდეგ გარდაიცვალა.

  • გარდაცვალების მიზეზი, ჯერჯერობით, უცნობია.
  • ოპოზიციონერის თანამოაზრეები მიიჩნევენ, რომ ის მოკლეს და კრემლი დანაშაულის კვალის დამალვას ცდილობს

გაიგე მეტი: "შეიძლება, იმედები გაგიცრუოთ, მაგრამ ნავალნი მართლაც თრომბით გარდაიცვალა" — უკრაინის დაზვერვის სამმართველოს ხელმძღვანელი