მოკლედ: ექვსი წლის გოგო, რომელიც ღაზაში იანვრის ბოლოს გაუჩინარდა, გარდაცვლილი იპოვეს.

• მასთან ერთად მიაგნეს მისი ნათესავების და სასწრაფო დახმარების 2 ექიმის ცხედრებს. ექიმები ბავშვის გადარჩენას ცდილობდნენ.

დეტალები: ჰინდ რაჯაბი ქალაქიდან დეიდასთან, ბიძასთან და სამ დეიდაშვილთან ერთად გარბოდა, როდესაც მანქანით ისრაელის ტანკების პირისპირ აღმოჩნდნენ.

• გავრცელდა აუდიო ჩანაწერი, სადაც ჰინდი სასწრაფო დახმარების სამსახურში რეკავს და ოპერატორები ვარაუდობენ, რომ გოგონა ერთადერთია, რომელიც მანქანაში ცოცხალი გადარჩა, ის ისრაელელ ჯარისკაცებს ნათესავების ცხედრებს შორის ემალებოდა.
• გოგონა შველას ითხოვდა, თუმცა სატელეფონო კავშირი მალე გაწყდა, მას შემდეგ, რაც კვლავ გაისმა სროლის ხმა.

პალესტინის წითელი ნახევარჯვრის საზოგადოების წარმომადგენლებმა შეძლეს, შაბათს, 10 თებერვალს იმ ადგილას მისულიყვნენ, სადაც ჰინდი დაიღუპა. ეს ტერიტორია, რომელიც საბრძოლო ზონა იყო, მანამდე დაკეტილი იყო. მათ იპოვეს მანქანა, რომელშიც ჰინდი და მისი ნათესავები იყვნენ მოკლული.

• მათი მანქანიდან რამდენიმე მეტრის მოშორებით, კიდევ ერთი ავტომობილი ნახეს — სრულიად დამწვარი. როგორც წითელი ნახევარმთვარის წარმომადგენლები ამბობენ, ეს იყო სასწრაფო დახმარების მანქანა, რომელიც გოგონას დასახმარებლად მივიდა.
• ორგანიზაციის თქმით, სასწრაფო დახმარების წარმომადგენლები — იუსუფ ალ-ზეინო და აჰმედ ალ-მადუნი ისრაელის ჯარის დაბომბვას ემსხვერპლნენ.

წითელმა ნახევარმთვარემ გაავრცელა განცხადება, სადაც ისრაელს ადანაშაულებენ სასწრაფო დახმარების მანქანაზე განზრახ თავდასხმაში.

• "ოკუპანტებმა განგებ გაუხსნეს ცეცხლი წითელი ნახევარმთვარის გუნდს, იმის მიუხედავად, რომ მათ ჩვენ წინასწარ დავუკავშირდით და მოგვცეს ნება, სასწრაფო დახმარების მანქანა ადგილზე მისულიყო ბავშვის გადასარჩენად", — ნათქვამია განცხადებაში.
• მათ, ასევე, ბიბისის უთხრეს, რომ რამდენიმე საათი დასჭირდათ ისრაელის არმიასთან კოორდინაციისთვის.
• "ჩვენ გვქონდა კოორდინაცია, აგვინთეს მწვანე შუქი. ადგილზე მისვლის შემდეგ, ჯგუფმა დაადასტურა, რომ ხედავდნენ მანქანას, რომელშიც ჰინდი იმყოფებოდა. ბოლოს კი, რაც ჩვენ გავიგეთ, იყო ხანგრძლივი სროლის ხმა", — თქვეს მათ.

მას შემდეგ, რაც გავრცელდა ჰინდისა და სასწრაფო დახმარების სამსახურის ოპერატორების აუდიოჩანაწერი, დაიწყო კამპანია იმის გასარკვევად, თუ რა ბედი ეწია გოგოს.

• ჰინდის დედა, ვიდრე მისი შვილის ცხედარს იპოვიდნენ, ამბობდა, რომ გოგოს ელოდებოდა და ის ყოველ წამს შეიძლებოდა მასთან მიეყვანათ.
• ახლა ის მოითხოვს, რომ მომხდარზე ვინმემ პასუხი აგოს.

"ყველა ადამიანი, ვისაც ესმის ჩემი ხმა და ვინც გაიგო ჩემი შვილის მუდარის ხმა, თუმცა არ გადაარჩინეს ის, ღმერთის წინაშე აგებს პასუხს. ნეთანიაჰუ, ბაიდენი და ყველა, ვინც ჩვენი, ღაზისა და მისი ხალხს წინააღმდეგია, მთელი გულით ვლოცულობ მათ წინააღმდეგ", — თქვა გოგოს დედამ.

ბოლო ხაზი: BBC-მ სცადა, ოპერაციის დეტალების შესახებ ინფორმაცია ისრაელის ჯარისგან მოეპოვებინათ, ისევე, როგორც ინფორმაცია ჰინდისა და სასწრაფო დახმარების მანქანის შესახებ, თუმცა მათ უპასუხეს, რომ ცნობებს ჯერ კიდევ ამოწმებდნენ.

• ომის წესების მიხედვით, სამედიცინო პერსონალი უნდა იყოს დაცული და არ უნდა ამოიღონ მიზანში, ბრძოლის დროს. დაჭრილებს კი უნდა მისცენ სამედიცინო დახმარების საშუალება.
• ისრაელმა, ომის დაწყების შემდეგ, არაერთხელ თქვა, რომ ჰამასი იარაღისა და მებრძოლების გადასაყვანად სასწრაფო დახმარების მანქანებს იყენებდა.