მოკლედ: პარტია მოქალაქეების ლიდერი ალეკო ელისაშვილი პარლამენტში ჩოხით მივიდა. პარლამენტმა დღეს მთავრობის განახლებული შემადგენლობა უნდა დაამტკიცოს.

დეტალები: ელისაშვილის თქმით, ჩოხა იმიტომ ჩაიცვა, რომ წინა სხდომაზე პარლამენტის თავმჯდომარე შალვა პაპუაშვილმა ჩაცმულობა დაუწუნა.

  • "წინაზე დამიწუნეს ტანსაცმელი, რა გაცვიაო, მითხრა პაპუაშვილმა და რა ვიცი, იმედია ჩოხა-ახალუხსაც არ იწუნებს. ხანჯალი სპეციალურად არც გამიკეთებია, უხერხულობა არ შემიქმნია შემოტანაზე. ვნახოთ, შეიძლება პაპუაშვილმა ან მასრები დამიწუნოს, ან ქამარი, ან ჩოხის კალთა. ვნახოთ აბა, შარიანი კაცია", — თქვა ალეკო ელისაშვილმა.

რა მოხდა: 6 თებერვალს, შალვა პაპუაშვილმა ალეკო ელისაშვილს ჩაცმულობა დაუწუნა და უთხრა, რომ "საკანონმდებლო ორგანოში არსებობს ჩაცმის ეტიკეტი".

  • ჩაცმულობაზე შენიშვნა კი მას შემდეგ მისცა, რაც ალეკო ელისაშვილმა ქართული ოცნება გააკრიტიკა, იმის გამო, რომ პრეზიდენტ სალომე ზურაბიშვილს სხდომათა დარბაზში შემოსვლისას, ფეხზე არ წამოუდგნენ.
  • "ერთი ხალხური ლექსი გამახსენდა, ათასად რომ კაცი დაფასდა და ათი ათასად ზრდილობა. ახლა ვფიქრობდი, რა რეაქცია ექნებოდა ამ ლექსის დამწერს, მას რომ ენახა სცენა, რაც დღეს ყველამ ვნახეთ — პარლამენტში შემოდის საქართველოს პრეზიდენტი და მმართველი პარტია არ ესალმება. ფეხზე არ დგება არც ქალი, არც კაცი",— განაცხადა 6 თებერვალს ელისაშვილმა.
  • საპასუხოდ, პაპუაშვილმა ელისაშვილს უთხრა, რომ მისალმების ფორმას რეგლამენტი არ აწესრიგებს, დეპუტატის ჩაცმულობისგან განსხვავებით და საპარლამენტო რეგლამენტის 84-ე მუხლის მეშვიდე პუნქტი დააციტირა, რომლის მიხედვით, სხდომათა დარბაზში მყოფთა ჩაცმულობა უნდა იყოს საპროტოკოლო — საქმიანი, ან ეროვნული.
  • "მე თქვენს ჩაცმულობაში რაიმე საქმიანი და საპროტოკოლო ვერ დავინახე და მაინც და მაინც ჩოხა-ახალუხსა და ხმალ -ხანჯალსაც ვერ გატყობთ", — უთხრა პაპუაშვილმა ალეკო ელისაშვილს.