მოკლედ: აზერბაიჯანის საპრეზიდენტო არჩევნების ეგზიტპოლების მონაცემები ცნობილია — ილჰამ ალიევი ხმების 93.9%-ით ლიდერობს.

ვინ არიან ალიევის კონკურენტები დღევამდელ არჩევნებში: მოქმედ პრეზიდენტს 6 კონკურენტი ჰყავს, თუმცა ექვსივე მმართველი პარტიის მხარდამჭერია.

ისინი არიან:

ფაზილ მუსტაფა — დეპუტატი. მუსტაფამ მონაწილეობა მიიღო 2008 წლის საპრეზიდენტო არჩევნებში და მესამე ადგილი დაიკავა 2,43%-ით. ის, ამჟამად, არის პარლამენტის კულტურის კომიტეტის თავმჯდომარის მოადგილე და აზერბაიჯანის დელეგაციის წევრი ევროპის საბჭოს საპარლამენტო ასამბლეაში (PACE).

ზაჰიდ ორუჯოვი — დეპუტატი და პარლამენტის ადამიანის უფლებათა დაცვის კომიტეტის თავმჯდომარე.

გუდრატ ჰასანგულიევი — დეპუტატი და სრულიად აზერბაიჯანის სახალხო ფრონტის პარტიის თავმჯდომარე 2004 წლიდან. ჰასანგულიევი მონაწილეობდა 2003, 2008, 2013 და 2018 წლის საპრეზიდენტო არჩევნებში.

რაზი ნურულაევი — დეპუტატი და ეროვნული ფრონტის პარტიის თავმჯდომარე. ნურულაევმა მონაწილეობა მიიღო აზერბაიჯანის ბოლო საპრეზიდენტო არჩევნებში და ბოლო ადგილი დაიკავა რვა კანდიდატიდან, 0,74%-ით.

ელშად მუსაევი — "დიდი აზერბაიჯანის" პარტიის თავმჯდომარე. ელშად მუსაევმა 2003 წლის საპრეზიდენტო არჩევნებში საკუთარი კანდიდატურა წარადგინა, მაგრამ ცენტრალურმა საარჩევნო კომისიისგან მაშინ უარი მიიღო.

ფუად ალიევი - დამოუკიდებელი პროფკავშირის თავმჯდომარე. ალიევმა 2008 წლის საპრეზიდენტო არჩევნებში მიიღო მონაწილეობა და ხმების 0,77%-ით მეექვსე ადგილი დაიკავა.

როგორ ჩაიარა საარჩევნო პროცესმა: ექსცესების გარეშე, თუმცა მედია დარღვევების შესახებ წერდა.

  • მაგალითად, ლოკალური ინტერნეტი შეფერხებებით მუშაობდა და მედიის წარმომადგენლებს ინფორმაციის გადაცემასთან დაკავშირებით, პრობლემები შეექმნათ.
  • ასევე, დააფიქსირეს ადამიანები, რომლებმაც ხმა სხვადასხვა უბანზე მისცეს.
  • გადაიღეს კადრები, სადაც ჩანს, რომ ამომრჩევლები რამდენიმე ბიულეტენს ერთად ხაზავენ.
  • ეუთო-ს მისია, რომელიც პროცესს აკვირდებოდა, ხვალ, 8 თებერვალს პრესკონფერენციას გამართავს და საზოგადოებას მათი დაკვირვების შედეგებს გააცნობს.

უფრო ვრცლად, როგორ ვითარდებოდა მოვლენები დღის განმავლობაში, ნახეთ აქ.