რა ხდება: ქართული ოცნების პარტიულმა ყრილობამ ერთხმად დაამტკიცა ირაკლი ღარიბაშვილი ახალი თავმჯდომარის თანამდებობაზე.

დეტალები: ყრილობის საჯარო ნაწილი პარტიის უკვე ყოფილმა თავმჯდომარემ, ირაკლი კობახიძემ გახსნა. ის განსაკუთრებით მიესალმე ბიძინა ივანიშვილს, როგორც პარტიის დამფუძნებელსა და ახლა უკვე საპატიო თავმჯდომარეს.

რა თქვა კობახიძემ: "უკვე დასრულდა ყრილობის სამუშაო ნაწილი, სადაც დელეგატებმა მოისმინეს პოლიტიკური საბჭოსა და სარევიზიო კომისიის ანგარიშები.

  • პარტიის წესდების თანახმად, ყრილობაზე ხელახლა დამტკიცდა პოლიტიკური საბჭოსა და სარევიზიო საბჭოს შემადგენლობა.
  • ახლა კი, პარტიამ უნდა აირჩიოს ახალი თავმჯდომარე. როგორც საზოგადოებისთვის ცნობილია, თანამდებობაზე წარდგენილია ირაკლი ღარიბაშვილის კანდიდატურა."

ამის შემდეგ, პარტიამ ერთხმად დაამტკიცა პრემიერ-მინისტრობიდან მოულოდნელად გადამდგარი ირაკლი ღარიბაშვილი პარტიის ახალი თავმჯდომარის თანამდებობაზე.

  • ღარიბაშვილმა ყრილობაზე შეკრებილებს სიტყვით მიმართა და შემდეგ, ყრილობამ ახალი პრემიერ-მინისტრის კანდიდატურაზე ირაკლი კობახიძეს დაუჭირა მხარი.

პროცედურულად: მას შემდეგ, რაც მოქმედმა პრემიერ-მინისტრმა, ირაკლი ღარიბაშვილმა გადადგომის თაობაზე განაცხადა, კანონის მიხედვით, უფლებამოსილება შეჩერდა მინისტრთა კაბინეტის სრულ შემადგენლობას და ახლა ისინი მოვალეობის შემსრულებლები არიან.

  • სამთავრობო იმედის მიხედვით, პრემიერ-მინისტრობის ახალი კანდიდატი, ირაკლი კობახიძე სამთავრობო პროგრამას საქართველოს პარლამენტს ხვალ, 2 თებერვალს წარუდგენს.
  • კობახიძე ასევე წარადგენს პარლამენტში მინისტრთა კაბინეტის განახლებულ შემადგენლობას.
  • იმედი აცხადებს, რომ მოსალოდნელია, შეიცვალოს რამდენიმე მინისტრი.
    საქართველოს პარლამენტს ხვალიდან, 2 თებერვლიდან ექნება მომდევნო 2 კვირა
  • იმისთვის, რომ ნდობა გამოუცხადოს პრემიერ-მინისტრობის ახალ კანდიდატსა და მინისტრთა კაბინეტს.

კონტექსტი: მოქმედმა პრემიერ-მინისტრმა, ირაკლი ღარიბაშვილმა მოულოდნელად დატოვა პრემიერ-მინისტრობის პოსტი 29 იანვარს, დღის ხუთ საათზე.

  • მის განცხადებას წინ უძღოდა სახელისუფლებო ტელეარხის, იმედის მიერ, იმავე დღის დილით გავრცელებული ექსკლუზიური ინფორმაცია, რომლის მიხედვით, ოცნების პოლიტსაბჭოს გადაწყვეტილებით, ღარიბაშვილს პრემიერად კობახიძე შეცვლის, კობახიძეს კი ღარიბაშვილი ჩაანაცვლებს პარტიის თავმჯდომარედ.
  • ღარიბაშვილი მეორე ვადით პრემიერ-მინისტრად 2021 წელს დანიშნა ოცნების პოლიტსაბჭომ მას შემდეგ, რაც პრემიერობიდან გიორგი გახარია გადადგა.
  • მანამდე, ღარიბაშვილი ამ პოზიციას 2013-დან 2015 წლის დეკემბრამდე იკავებდა.

ბოლო ხაზი: შიდა პარტიული და სამთავრობო ცვლილებები მოჰყვა ბიძინა ივანიშვილის პოლიტიკაში მესამედ მოსვლას: 2023 წლის 30 დეკემბერს ის პარტიის ყრილობას დაესწრო და ოცნებამ პარტიის საპატიო თავმჯდომარედ გამოაცხადა.