ცნობილი ირლანდიელი მსახიობი პოლ მესკალი ახალ ფილმში უილიამ შექსპირის როლს მოირგებს. მეგი ო'ფერელის ისტორიული ჟანრის რომანის ჰამნეტის ეკრანიზაციას ოსკაროსანი რეჟისორი ქლოი ჟაო გადაიღებს. უკვე ცნობილია ისიც, რომ ფილმში დრამატურგის ცოლს, ენ ჰეთეუეის, ჯესი ბაკლი განასახიერებს.

"ერთი სული მაქვს", — აღნიშნავს მესკალი Vogue-თან ინტერვიუში, — "ეს წიგნი [ჰამნეტი] შთამბეჭდავი იყო. ადრე რომ გეთქვათ, წელს ამ პროექტზე იმუშავებო, ვერც კი დავიჯერებდი. ჯესი და მე კი ვყოფილვართ ერთ ფილმში, მაგრამ ერთად არც გვიმუშავია და არც ეკრანზე გამოვჩენილვართ. ვფიქრობ, ის ჩვენი დროის ერთ-ერთი შესანიშნავი მსახიობია. მოუთმენლად ველოდები ქლოისთან ერთად მუშაობასაც".

///

პოლ მესკალს მაყურებელთა ფართო წრე მინისერიალ ჩვეულებრივი ადამიანებიდან (Normal People) იცნობს, რომელშიც მან კონელ უოლდრონის როლი შეასრულა. ამ ნამუშევარმა ახალგაზრდა მსახიობს ბრიტანული კინოაკადემიის სატელევიზიო ჯილდოც (BAFTA TV Award) მოუტანა.

ქლოი ჟაომ კი მსოფლიო აღიარება 2020 წლის ფილმით მომთაბარეთა მიწა (Nomadland) მოიპოვა. ჯესიკა ბრუდერის არამხატვრული წიგნის მიხედვით გადაღებულმა ფილმმა, ფრენსის მაკდორმანდით მთავარ როლში, ჟაო პირველ ოსკაროსან აზიელ ქალ რეჟისორად აქცია.

რაც შეეხება ჰამნეტს, ჩრდილოეთირლანდიელი მწერლის, მეგი ო'ფერელის, 2020 წელს გამოცემული ეს რომანი ბოლო პერიოდის ერთ-ერთი ყველაზე განხილვადი წიგნია. ნაწარმოები უილიამ შექსპირის 11 წლის ასაკში გარდაცვლილი შვილის ამბავს მხატვრულად გვიყვება. ჰამნეტმა არაერთი პრიზი მიიღო, მათ შორის, ქალთა პრემია მხატვრულ ლიტერატურაში (Women's Prize for Fiction). ისტორიული და ბიოგრაფიული ცნობებით გამდიდრებული ნაწარმოები ბესტსელერადაც იქცა — მსოფლიოში ის მილიონ-ნახევარზე მეტ ეგზემპლარად გაიყიდა. ჰამნეტი ქართულად ქარჩხაძის გამომცემლობამ დაბეჭდა 2023 წელს. რომანის მთარგმნელი თეონა ბითაძეა.

თუ ფილმები შენი ცხოვრების განუყოფელი ნაწილია და მათი განხილვაც გიყვარს, შემოგვიერთდი ჯგუფში ერთი ფილმიც და...