მოკლედ: თბილისში, ცოტნე დადიანის ქუჩა N259-თან მოქალაქეები იკრიბებიან — ამ სახლიდან დღეს, აღსრულების ბიურო, კაკიაშვილების ოჯახის გამოსახლებას გეგმავს.

დეტალები: ბინაში სამი ადამიანი ცხოვრობს, მარიამ კაკიაშვილი, რომელიც აგვისტოს ომის ვეტერანია და მისი 2 არასრულწლოვანი შვილი.

  • სოციალური სამართლიანობის ცენტრის ინფორმაციით, კაკიაშვილების ოჯახს მევახშეებმა ორი ბინა წაართვეს და ამჯერად მათი უკანასკნელი თავშესაფრიდან (მიშენებიდან) გამოსახლებას აპირებენ.

მარიამ კაკიაშვილი თანახმაა, ვალი დაფაროს, თუმცა ამას ხანმოკლე პერიოდში ვერ შეძლებს.

  • "თუ დამეხმარებიან იმაში, რომ წამოიყვანენ მოლაპარაკებაზე [მევალეს], რომ ისე დავუფარო, მაშინ კი ბატონო და თუ ომს აპირებენ და მოვლენ აგრესიით, რა თქმა უნდა, ჩვენც დავხვდებით აგრესიით", — თქვა მარიამ კაკიაშვილმა.
მარიამ კაკიაშვილი

მარიამ კაკიაშვილი

ფოტო: მარიამ მერლანი / On.ge

იქ ჯერ არ მისულან აღსრულების ეროვნული ბიუროს თანამშრომლები, ადგილზე იმყოფება საპატრულო პოლიცია.

ბოლო ხაზი: აღსრულების ბიურომ გუშინ კეკელიძის ქუჩიდან ხატიაშვილების ოჯახი გამოასახლა.

  • უწყება 26 იანვარს კიდევ ერთი ოჯახის, ბალახაძეების გამოსახლებას გეგმავს.