რა ხდება: აღსრულების ეროვნული ბიურო უარყოფს ინფორმაციას, რომ აღსრულების პოლიციამ კეკელიძეზე მდებარე სახლში, საიდანაც დღეს ოჯახი გამოასახლეს, გაზი გაუშვა.

განცხადებაში აღნიშნულია, რომ, სავარაუდიდ, წიწაკის სპრეი ბინაში მყოფმა ადამიანებმა, პროცესის ხელშეშლის მიზნით, სამაშველო სამსახურისა და აღსრულების პოლიციის მიმართ გამოიყენეს.

დეტალები: უწყების ინფორმაციით, დაშავდა რამდენიმე სამართალდამცველი.

  • ასევე, ბინაში მყოფებმა სიტყვიერი და ფიზიკური შეურაცხყოფა მიაყენეს აღსრულების პოლიციელებს.
  • განცხადების მიხედვით, სხეულის დაზიანება მიიღეს აღსრულების პოლიციის თანამშრომლებმა, ასევე დაზიანდა სახელმწიფო ქონება.

მოქალაქეები, რომლებიც გამოსახლების პროცესისთვის ხელის შესაშლელად დღეს ხატიაშვილების ბინაში იმყოფებოდნენ, ამბობდნენ, რომ "რაღაც ნივთიერების სუნი იგრძნეს".

  • "სუნთქვა იყო შეუძლებელი, არ ვიცი გაზი იყო თუ სხვა ნივთიერება, ფაქტია ყველას გვახველებდა და ძალიან გვიჭირდა სუნთქვა", — უთხრა On.ge-ს სოფო ვერძეულმაც, პლატფორმა კომენტარის სამართლის პოლიტიკის მიმართულების რედაქტორმა.
  • "პოლიციამ გაზი გაუშვა სახლში, გამოსახლების პროცესში, ხალხი რომ აიძულოს შენობის დასატოვებლად", — დაწერა სოციალურ ქსელში ვახუშტი მენაბდემ, კომენტარის თანადამფუძნებელმა.

რა ვიცით ხატიაშვილების ოჯახის პრობლემაზე: აღსრულების ეროვნული ბიუროს ინფორმაციით, მათი გამოსახლების პროცესი, აღსრულების პოლიციის მიერ, 6 წლის განმავლობაში 5-ჯერ იყო გადადებული.

  • "ამ დროის მანძილზე აღსრულების ეროვნულმა ბიურომ საქმის მორიგებით დასრულების მიზნით, გაატარა ყველა ღონისძიება, აქტიურად მიმდინარეობდა მხარეებს შორის მოლაპარაკებები, სადაც კრედიტორი მოვალეს სთავაზობდა ალტერნატიულ საცხოვრებელ ფართს, რაზედაც მოვალემ განაცხადა უარი", — აღნიშნულია ბიუროს განცხადებაში.

ხატიაშვილების მსგავსად, 24 და 26 იანვარს, აღსრულების ეროვნული ბიურო კაკიაშვილებისა და ბალახაძეების ოჯახების გამოსახლების გეგმავს.

  • "აღსანიშნავია, რომ, როგორც ირკვევა, სამივე ოჯახი თანახმაა, დაფაროს ძირითადი ფინანსური დავალიანება, თუმცა ამ ეტაპზე მათ ამის საშუალება არ ეძლევათ", — აცხადებს სოციალური სამართლიანობის ცენტრი (SJC).
  • ორგანიზაცია, ასევე, წერს, რომ მსგავსი შემთხვევები საქართველოში გამონაკლისს არ წარმოადგენს: "მანკიერ ფულად-საკრედიტო პოლიტიკაში კრედიტორთა უმთავრესი ინტერესი იპოთეკით დატვირთული ქონების დაუფლებაა — მევახშეები ბოროტად სარგებლობენ მსესხებლის მძიმე სოციალურ-ეკონომიკური მდგომარეობით, რასაც წლების განმავლობაში, სასესხო ხელშეკრულებების კაბალური პირობებით დადება და საცხოვრისის დაკარგვის მომეტებული რისკები მოჰყვება", — ნათქვამია მათ განცხადებაში.