რა ხდება: აშშ-ის და დიდი ბრიტანეთის ძალებმა, იემენში, ამბოხებული ჰუსიტების ობიექტების დაბომბვა დაიწყეს.

• დარტყმები განხორციელდა დედაქალაქ სანაასა და პორტ ჰუდაიდაზე.

• აშშ-ის ოფიციალურმა წარმომადგენელმა "როიტერსს" განუცხადა, რომ დარტყმები განხორციელდა თვითმფრინავით, გემებით და წყალქვეშა ნავით.

ეს არის აშშ-ის პირველი სამხედრო დარტყმა იემენში ჰუსიტების წინააღმდეგ მას შემდეგ, რაც ირანის მიერ მხარდაჭერილმა დაჯგუფებამ, დრონებითა და რაკეტებით წითელ ზღვაში, კომერციულ გემებზე თავდასხმების სერია დაიწყო.

მანამდე, დასავლეთის ქვეყნებმა არაერთხელ გააფრთხილეს ამბოხებულები, გემებზე თავდასხმები შეეწყვიტათ.

ამავე თემაზე: თავდასხმები წითელ ზღვაში — ვინ არიან ჰუსიტები და რატომ ბომბავენ გემებს

რას ამბობს ბაიდენი

აშშ-ის პრეზიდენტის თქმით, თავდასხმები განხორციელდა იმ ობიექტებზე, რომლებსაც ჰუსიტი მეამბოხეები წითელ ზღვაში გემებზე თავდასხმებისთვის იყენებენ, რაც საფრთხეს უქმნის ნაოსნობის თავისუფლებას მსოფლიოსთვის სასიცოცხლოდ მნიშვნელოვან საზღვაო მონაკვეთზე.

• მისი თქმით, დარტყმები განხორციელდა აშშ-ს ძალების მიერ, "გაერთიანებულ სამეფოსთან ერთად და ავსტრალიის, ბაჰრეინის, კანადისა და ნიდერლანდების მხარდაჭერით“.
• ბაიდენის წერილობით განცხადებაში აღნიშნულია, რომ თავდასხმა თავდაცვითია.
• მან, ასევე, თქვა, რომ აშშ და მისი მოკავშირეები "არ მოითმენენ თავდასხმებს მათ პერსონალზე და არ დაუშვებენ მტრულად განწყობილ ძალებს, საფრთხე შეუქმნან ნაოსნობის თავისუფლებას".
• მან, ასევე, განაცხადა შემდგომი შესაძლო მოქმედებების შესახებ.

”მე არ მოვერიდები მივმართო შემდგომ ზომებს, ჩვენი ხალხის დასაცავად და საერთაშორისო ვაჭრობის თავისუფლებისთვის, თუ ამისი საჭიროება იქნება”, - თქვა ბაიდენმა.

სუნაკი თავდასხმების შესახებ

ბაიდენის პარალელურად გავრცელებულ განცხადებაში, დიდი ბრიტანეთის პრემიერ მინისტრი, რიში სუნაკი ამბობს, რომ ბრიტანეთის სამეფო სამხედრო საჰაერო ძალები მონაწილეობდნენ თავდასხმებში იემენში, ჰუსიტი მეამბოხეების ობიექტებზე.

• "გაერთიანებული სამეფო ყოველთვის მხარს დაუჭერს ნავიგაციის თავისუფლებას “, — ამბობს ის.

როგორია ჰუსიტების, ჰეზბოლას და მათი მთავარი მოკავშირის, ირანის პოზიცია

თავდასხმების შესახებ ჰუსიტების საგარეო საქმეთა მინისტრის მოადგილემ, ჰუსეინ ალ-იზიმ იემენის ტელეარხ Al-Masirah-ს ესაუბრა.

• მან თქვა, რომ აშშ-სა და დიდი ბრიტანეთს "მძიმე ფასის" გადახდა მოუწევთ თავდასხმების გამო.

ირანის საგარეო საქმეთა სამინისტრომ დაგმო იემენზე თავდასხმები, როგორც "იემენის სუვერენიტეტისა და ტერიტორიული მთლიანობის" და საერთაშორისო კანონების დარღვევა.

• "თავდასხმებს "„არავითარი შედეგი არ ექნება, რეგიონში დაუცველობისა და არასტაბილურობის განცდის გაღვივების გარდა“, — თქვა სამინისტროს სპიკერმა ნასერ კანანმა სამინისტროს Telegram არხზე გამოქვეყნებულ პოსტში.

თავდასხმა დაგმო ირანის მიერ მხარდაჭერილმა ლიბანურმა შეიარაღებულმა დაჯგუფება ჰეზბოლამ.

• "ამერიკული აგრესია კიდევ ერთხელ ადასტურებს, რომ აშშ სრულად არის პასუხისმგებელი პარტნიორ სიონისტ მტერთან ერთად, ღაზასა და რეგიონში ჩადენილი ტრაგედიებსა და ხოცვა-ჟლეტაზე", — განაცხადა ჰეზბოლამ.

მსოფლიოს სხვა ქვეყნების გამოხმაურებები

საუდის არაბეთმა სთხოვა აშშ-ს და მის მოკავშირეებს, გამოიჩინონ თავშეკავება და "აირიდონ ესკალაცია".

• მედიის ცნობით, სამეფოს საგარეო საქმეთა სამინისტროს განცხადებაში ნათქვამია, რომ რიადი სიტუაციას "დიდი შეშფოთებით" აკვირდება.

ამერიკისა და ბრიტანეთის მოკავშირე ქვეყნების — ავსტრალიის, ბაჰრეინის, კანადის, დანიის, გერმანიის, ნიდერლანდების, ახალი ზელანდიის და კორეის რესპუბლიკის მთავრობებმა ერთობლივი განცხადება გამოაქვეყნეს.

• განცხადებაში წერია, რომ დარტყმები განხორციელდა "ინდივიდუალური და კოლექტიური თავდაცვის უფლების შესაბამისად".
• მოკავშირეები წერენ, რომ მათ მიზნად რჩება დაძაბულობის დეესკალაცია და წითელ ზღვაში სტაბილურობის აღდგენა.

ვინ არიან ჰუსიტები

ჰუსიტური მოძრაობა, რომელიც ცნობილია, ასევე, სახელით ანსარალა (ღმერთის მიმდევრები), იემენის სამოქალაქო ომის ერთ-ერთი მხარეა. ომი ქვეყანაში უკვე თითქმის 10 წელია გრძელდება.

• ჰუსიტური მოძრაობა 1990-იან წლებში ჩამოყალიბდა, როდესაც მისმა ლიდერმა, ჰუსეინ ალ-ჰუსიმ დააარსა შიიტურ-ზეიდიტური რელიგიური მოძრაობა მორწმუნე ახალგაზრდობა.
• ზეიდიტები (შიიტური სექტა) იემენს საუკუნეების განმავლობაში მართავდნენ, მაგრამ 1962 წლიდან, როდესაც ხელისუფლებაში სუნიტური რეჟიმი მოვიდა, მათი მარგინალიზება მოხდა. ალ-ჰუსის მოძრაობის დაარსების მიზანი იყო, წინააღმდეგობა გაეწიათ რადიკალური სუნიზმისთვის, განსაკუთრებით, ვაჰაბიტური იდეებისთვის საუდის არაბეთიდან. მის მიმდევრებს ჰუსიტები ეწოდათ.

რატომ ბომბავენ ისინი გემებს

ჰუსიტები მხარს უჭერენ ჰამასს და ამბობენ, რომ წითელ ზღვაში ბომბავენ გემებს, რომლებსაც კავშირი აქვთ ისრაელთან, თუმცა, ეს ყოველთვის ასე არ არის.

• ისინი აცხადებენ, რომ მხოლოდ მაშინ შეჩერდებიან, როდესაც ისრაელი დაუშვებს საკვებისა და მედიკამენტების შეტანას ღაზაში;
• გემებზე შეტევით, ჰუსიტები ცდილობენ, დარტყმები მიაყენონ ისრაელის მოკავშირეებს, რათა მათი ზეწოლით ისრაელმა ღაზის დაბომბვა შეწყვიტოს.

რა საფრთხეს უქმნის ჰუსიტების თავდასხმები მსოფლიოს

ექსპერტები შიშობენ, რომ ჰუსიტების დრონებსა და რაკეტებით თავდასხმებს, კომერციულ ხომალდებზე, შეუძლია უფრო დიდი შოკის გამოწვევა მსოფლიო ეკონომიკისთვის.

• ასეთ თავდასხმებს კი ისინი, 9 დეკემბრის შემდეგ, თითქმის ყოველ დღე ახორციელებენ.
• მსოფლიოს ხუთი მსხვილი გადამზიდავი ფირმიდან ოთხმა - Maersk-მა, Hapag-Lloyd-მა, CMA CGM Group-მა და Evergreen-მა განაცხადეს, რომ თავდასხმების შიშის გამო, შეაჩერებენ ტრანსპორტირებას წითელ ზღვაში. მათ მსგავსად, რამდენიმე დღის წინ, წითელ ზღვაში ტვირთის გადაადგილებაზე უარი თქვა ნავთობის გიგანტმა BP-მ, რამაც ნავთობზე ფასების ზრდა გამოიწვია