რა ხდება: 12-მა სახელმწიფომ — აშშ-მა, დიდმა ბრიტანეთმა, ავსტრალიამ, ბაჰრეინმა, ბელგიამ, კანადამ, დანიამ, გერმანიამ, იტალიამ, იაპონიამ, ნიდერლანდებმა და ახალმა ზელანდიამ ჰუსიტები გააფრთხილა, სასწრაფოდ შეწყვიტონ თავდასხმები კომერციულ გემებზე წითელ ზღვაში.

• ამ თავდასხმებს მათ "უკანონო, მიუღებელი და დესტაბილიზაციის გამომწვევი უწოდეს". ასევე, აღნიშნეს, რომ სამოქალაქო გემებზე თავდასხმას არ შეიძლება რაიმე გამართლება ჰქონდეს.
• მოკავშირეებმა ამბოხებულებს მოუწოდეს, "დაუყოვნებლივ შეწყვიტონ" თავდასხმები, რომლებიც, მათი თქმით, "პირდაპირ საფრთხეს უქმნის ნაოსნობის თავისუფლებას" კრიტიკულ გზაზე, რომელზეც გლობალური ვაჭრობის, თითქმის, 15% გადის.
• შიშობენ, რომ თავდასხმების გამო, გაიზრდება საწვავის ფასი, ასევე, დაზიანდება მიწოდების ჯაჭვები.

ამ თემაზე: თავდასხმები წითელ ზღვაში — ვინ არიან ჰუსიტები და რატომ ბომბავენ გემებს

დეტალები: ჰუსიტები, რომლებიც ამბობენ, რომ ისრაელი-ჰამასის ომში ჰამასს უჭერენ მხარს, წითელ ზღვაში გემებს ნოემბრის შემდეგ ესხმიან.

• მათი სამიზნე უკვე 20-ზე მეტი კომერციული გემი გახდა.
• ამბოხებულების მტკიცებით, ყველა მათგანი ისრაელთან იყო კავშირში, თუმცა ეს, ხშირ შემთხვევაში, სიმართლეს არ შეესაბამებოდა.
• ჰუსიტები იყენებენ რაკეტებს, დრონებს, კატერებს და ვერტმფრენებს.

რეგიონში ომის ესკალაციის საფრთხე

ოთხშაბათს საღამოს, გაეროს უშიშროების საბჭოში გამართულ დებატებზე, ერთხმად დაგმეს ჰუსიტების თავდასხმები, თუმცა აქვე თქვეს, რომ აუცილებელია თავიდან იქნეს არიდებული შემდგომი ესკალაცია.

• ამერიკის შეერთებული შტატების ელჩმა გაეროში მენეჯმენტისა და რეფორმების საკითხებში, კრის ლუმ თქვა, რომ თავდასხმებმა "სერიოზული გავლენა მოახდინა საზღვაო უსაფრთხოებაზე, საერთაშორისო გადაზიდვებსა და ვაჭრობაზე“.
• მისივე თქმით, ირანის როლი "პრობლემის საფუძველია".
• ირანი, თავის მხრივ, უარყოფს, რომ თავდასხმებს მხარს უჭერს. ამის მიუხედავად, უცნობია, როგორი იქნება ირანის რეაქცია, თუ დასავლეთი მისი იემენელი მოკავშირეების წინააღმდეგ საჰაერო თავდასხმებს განახორციელებს.

ბოლო ხაზი: ჰუსიტური მოძრაობა, რომელიც ცნობილია, ასევე, სახელით ანსარალა (ღმერთის მიმდევრები), იემენის სამოქალაქო ომის ერთ-ერთი მხარეა.

• ისინი 2014 წლიდან იბრძვიან იემენის მთავრობის წინააღმდეგ და აკონტროლებენ როგორც დედაქალაქ სანაას, ასევე ქვეყნის ჩრდილოეთს და წითელი ზღვის სანაპირო ზოლს.
• იემენის მთავრობას, ჰუსიტების წინააღმდეგ, მხარს უჭერს არაბული ქვეყნების კოალიცია, რომელსაც საუდის არაბეთი და არაბეთის გაერთიანებული საემიროები ხელმძღვანელობენ.