დღეს, 13 ივლისს, 19 საათზე, დედაენის ბაღში, თეთრი ხმაური მოძრაობის წევრები და დაკავებული მსახიობის, გიორგი გიორგანაშვილის მხადამჭერები შეიკრიბნენ. აქციის მონაწილეებმა ქვეყანაში არსებული ნარკოპოლიტიკა გააპროტესტეს.

გიორგანაშვილი ხუთი თვის წინ დააკავეს. მას ბრალი განსაკუთრებით დიდი ოდენობით ბუპრენორფინის პირადი მოხმარების მიზნით ფლობისათვის წაუყენეს, სასჯელის ზომად კი რვიდან 20 წლამდე ან უვადო პატიმრობა ემუქრება.

აქციის ორგანიზატორები ამბობენ, რომ აღმოჩენილი ნარკოტიკული საშუალება მსახიობს არ ეკუთვნოდა და საქმეში მისი უდანაშაულობის დამადასტურებელ მრავალ დარღვევაზე მიუთითებენ.

მხარდამჭერ აქციას სხვადასხვა პოლიტიკური პარტიების წარმომადგენლები და გიორგი გიორგანაშვილის მეგობრები შეუერთდნენ.

On.ge-სთან საუბარში პარტია რესპუბლიკელების წევრმა თამარ კორძაიამ განაცხადა, რომ მათი პარტია ჰუმანურ ნარკოპოლიტიკას უჭერს მხარს:

"დღევანდელი სასტიკი ნარკოპოლიტიკის მსხვერპლია გიორგი გიორგანაშვილი და ჩვენ დროულად უნდა დავდგეთ ერთად, რათა კიდევ ერთი ადამიანის სიცოცხლე არ შეეწიროს. წლების ციხეში გატარება, მხოლოდ და მხოლოდ იმიტომ, რომ ნარკოტიკს მოიხმარს ადამიანი, არის სიცოცხლის წართმევა".

საკრებულოს დეპუტატმა და თბილისის მერობის კანდიდატმა ალექსანდრე ელისაშვილმა On.ge-სთან საუბრისას აღნიშნა, რომ იგი აქციას შეუერთდა როგორც მოქალაქე, რადგან მისთვის მიუღებელია არსებული რეპრესიული ნარკოპოლიტიკა:

"ნარკოტიკების მიღებისთვის ადამიანები ციხეში არ უნდა ისხდნენ. ბახალასნაირი გაუტეხელი ადამიანები ქმნიან რეალობას და ამას მივესალმები და კიდევ მეტად მეამაყება აქ დგომა".

თეთრი ხმაურის მოძრაობის წევრის დავით სუბელიანის განცხადებით, ბახალა არის გამბედაობის მაგალითი: "ჩვენ უნდა გავხდეთ მხარში დგომის მაგალითი, რათა ერთად დავამარცხოთ ქვეყანაში არსებული უსამართლო ნარკოპოლიტიკა".

დაკავებულმა გიორგი გიორგანაშვილმა, ადვოკატის მეშვეობით ციხიდან წერილი გამოგზავნა, რომელიც დღევანდელ აქციაზე საჯაროდ წაიკითხეს:

"არ ვაპირებ არანაირ კომპრომისზე წასვლას და ბოლომდე სამართლებრივად მივყვები პროტესტს, რისთვისაც მხოლოდ თქვენი თანადგომა მჭირდება. პროკურატურა ბოლომდე შეეცდება ჩემ ჩაძირვას და განადგურებას. ჩემი გამართლების შემთხვევაში რამოდენიმე პოლიციელის თავი ეწირება ამ ამბავს და შეეცდებიან მაქსიმალურად მოახდინონ ჩემზე ფსიქოლოგიური ზეწოლა, რომ დავნებდე და გავტყდე.

მინდა საზოგადოებას მოგმართოთ, ნუ იქნებით ინდეფერენტულები, ამგვარი პრობლემა ყველას შეიძლება შეგვეხოს. მოვითხოვოთ კანონის ლიბერალიზაცია და განვუდგეთ ამ დრაკონულ ნარკოპოლიტიკას, რომელიც მუდმივად მანკიერი ბერკეტი იქნება "სამართალდამცავებისთვის".

ამ ბრძოლაში ჩვენი ერთიანი პოზიცია ჩვენთვის საბოლოო გამარჯვების წინაპირობა იქნება და აიძულებს სახელმწიფოს შეცვალოს საკუთარი ძალადობრივი პოლიტიკა. ამ გზაზე ყოველი თქვენგანის ინდივიდუალური ბრძოლა მნიშვნელოვანია. იმას რაც ჩვენ უნდა გავაკეთოთ სხვა არ გაგვიკეთებს", - ნათქვამია მსახიობის წერილში.

ხვალ, 14 ივლისს, თბილისის საქალაქო სასამართლოში საქმის არსებითი განხილვა განახლდება.