მოკლედ: სოციალური სამართლიანობის ცენტრი საკონსტიტუციო სასამართლოში წარდგენილი სარჩელით ითხოვს, არაკონსტიტუციურად იქნეს ცნობილი პუნქტი კანონში უცხოელთა და მოქალაქეობის არმქონე პირთა სამართლებრივი მდგომარეობის შესახებ, რომლის მიხედვით, “უცხოელს საქართველოს ვიზის გაცემაზე, ან საქართველოში შემოსვლაზე, შეიძლება უარი ეთქვას საქართველოს კანონმდებლობით გათვალისწინებულ სხვა შემთხვევებში.“

რას გულისხმობს “ქვეპუნქტის თვითნებური პრაქტიკა”: არასამთავრობო ორგანიზაციის მიხედვით, სამართალდამცავი ორგანოები, საკუთარ გადაწყვეტილებებში, თითქმის არასდროს უთითებენ, კონკრეტულად, რომელი კანონმდებლობით გათვალისწინებული პირობით ეუბნებიან უცხოელს უარს საქართველოში შემოსვლაზე.

რატომ არის ეს პრობლემა: "სამართალდამცავი ორგანოების მიერ შედგენილ სიებში კონკრეტული პირების შეყვანის და ამოღების წესი და სტანდარტი არ არის განსაზღვრული“, — აცხადებს ორგანიზაცია: “ამ მუხლიდან გამომდინარე, არაერთ კრიტიკულ აქტივისტს, ჟურნალისტს, მკვლევარს, ბლოგერსა და სამოქალაქო ატივისტს, ასევე, საქართველოსთან ისტორიულად დაკავშრებულ არამოქალაქე პირებს ეთქვა უარი საქართველოში შემოსვლაზე.“

  • ასევე, პრობლემად მიიჩნევენ იმასაც, რომ უცხოელს, რომელსაც არსებული ნორმის საფუძველზე უარი ეთქვა საქართველოში შემოსვლაზე, გადაწყვეტილების გასაჩივრების შემთხვევაშიც არ აქვს წვდომა იმ მონაცემებზე, რაც საფუძვლად დაედო მის შესახებ გადაწყვეტილების მიღებას.
  • პრობლემურია ისიც, რომ სადავო ნორმა არ შეიცავს გადაწყვეტილების მისაღებად საჭირო რაიმე მითითებას ან სახელმძღვანელო წესს. "ამდენად, მოსამართლეს ერთმევა ყოველგვარი ბერკეტი, გააკონტროლოს ადმინისტრაციული ორგანოს დისკრეციული უფლებამოსილების ფარგლები, რაც ადმინისტრაციული ორგანოს საქმიანობაზე სასამართლო კონტროლს ეფემერულად აქცევს“.

კონტექსტი: 2022 წლიდან, რუსეთს მიერ, უკრაინაში სრულმასშტაბიანი ომის დაწყების შემდეგ, საქართველოში შემოსვლაზე მესაზღვრეებმა უარი უთხრეს უკრაინელ ბლოგერებსა და ჟურნალისტებს, რომლებიც კრიტიკულად არიან განწყობილი პუტინის რუსეთის მიმართ.

ბოლო ხაზი: სოციალური სამართლიანობის ცენტრი იმედს გამოთქვამს, რომ საკონსტიტუციო სასამართლო დროულად იმსჯელებს წარდგენილ სარჩელზე და “ხელს შეუწყობს ასობით ადამიანისთვის დარღვეული კონსტიტუციური უფლებების ეფექტურ რეალიზაციას.“