სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.

OC Media-ს რედაქცია ამჯობინებს, არ გამოიყენოს ისეთი ტერმინები, როგორიცაა "დე ფაქტო", "არაღიარებული" ან "ნაწილობრივ აღიარებული", როდესაც სტატია ეხება ოკუპირებულ აფხაზეთს ან ე.წ. სამხრეთ ოსეთს, ასევე, მთიან ყარაბაღს. ეს არ ასახავს რედაქციის პოზიციას მათ სტატუსთან დაკავშირებით.

აფხაზეთში ეთნიკურად ქართველი კაცი გარდაიცვალა, მას შემდეგ, რაც, გავრცელებული ინფორმაციით, მას პოლიციამ სცემა.

44 წლის ვიტალი (თემურ) კარბაია სოხუმის რესპუბლიკურ საავადმყოფოში გასული კვირის ბოლოს გარდაიცვალა.

მანამდე მას ჰქონდა პოლიციასთან დაპირისპირება გალში, აფხაზეთის აღმოსავლეთით მდებარე რაიონში, რომელიც, ძირითადად, ეთნიკური ქართველებით არის დასახლებული.

მისი გარდაცვალებიდან მალევე, ინტერნეტში გაჩნდა ცნობები, რომ კარბაიას პოლიციამ სასიკვდილოდ სცემა, ამის შესახებ წერდა მისი რამდენიმე ნათესავიც, რომლების საქართველოს მიერ კონტროლირებად ტერიტორიაზე ცხოვრობენ.

თუმცა, ინფორმაცია უარყვეს აფხაზმა სამართალდამცველებმა, განაცხადეს, რომ კარბაიამ თავი თავადვე დაიზიანა მას შემდეგ, რაც ნასვამ მდგომარეობაში დააკავეს.

კვირას რადიო თავისუფლებასთან საუბრისას, მისმა რძალმა განაცხადა, რომ კარბაიას სხეულზე აღენიშნება მრავლობითი დაზიანებები, მათ შორის, სისხლჩაქცევები და მოტეხილობები.

"დაზიანებები ყველგან აქვს. ის განადგურებულია, მოტეხილი აქვს ნეკნები, გვერდები და ძვლები”, — თქვა მან — "სხვა ჯერ არაფერი ვიცით. არ ვიცი, ცხედარს ექსპერტიზა ჩაუტარდა თუ არა“.

სამშაბათს, აფხაზეთის ადამიანის უფლებათა კომისარმა, ანას ქიშმარიამ მოითხოვა სწრაფი გამოძიების დაწყება კარბაიას გარდაცვალებასთან დაკავშირებით.

კომისარმა, ასევე, ხაზი გაუსვა "დაკავებულების მიმართ არაპროპორციული ფიზიკური ზეწოლისა და ძალადობის გამოყენების დაუშვებლობას“ და მოუწოდა სამართალდამცავებს "პატივი სცენ აფხაზეთის რესპუბლიკის კონსტიტუციით გარანტირებულ ადამიანის უფლებებსა და თავისუფლებებს“.

ურთიერთგამომრიცხავი ცნობები

ქართული უფლებადამცველი ჯგუფი DRI იუწყება, რომ მათ მიერ მოპოვებული ინფორმაციით, კარბაია პოლიციამ 6 დეკემბერს გააჩერა, მასთან ერთად მისი ცოლ-შვილიც იმყოფებოდა. კარბაიას მოსთხოვეს ნარკოტესტის გაკეთება.

DRI-ის ცნობით, კარბაიამ უარი თქვა ნარკოტესტის გაკეთებაზე, როგორც "დამამცირებელ მოპყრობაზე" ოჯახის წევრების თვალწინ და თქვა, რომ მას შემდეგ, რაც ცოლსა და შვილს სახლში მიიყვანდა, პოლიციის განყოფილებაში თავადვე გამოცხადდებოდა.

"ამ პასუხის გამო, მილიციელებმა მას სასტიკად სცემეს, რის შედეგადაც სიცოცხლესთან შეუთავსებელი დაზიანებები მიიღო“, — ნათქვამია მათ განცხადებაში.

DRI-ს ინფორმაციით, კარბაია გალის კლინიკაში აგდაიყვანეს, სადაც მკურნალობდნენ ნეკნების მოტეხილობისა და ტვინის შერყევის გამო, მოგვიანებით სოხუმში გადაიყვანეს, სადაც მიყენებული დაზიანებების შედეგად გარდაიცვალა.

ორშაბათს, აფხაზეთის შინაგან საქმეთა სამინისტრომ აფხაზურ საინფორმაციო სამსახურს აიაშარას განუცხადა, რომ კარბაიასა და პოლიციას შორის, 6 დეკემბერს დაპირისპირება მას შემდეგ მოხდა, რაც იგი გალის ბაზარში "მთვრალ მდგომარეობაში აწუხებდა მოქალაქეებს და უხამს სიტყვებს ამბობდა".

სამინისტროს ინფორმაციით, პოლიციამ კარბაია გალის პოლიციის განყოფილებაში წაიყვანა, სადაც ის "განაგრძობდა უხამსი სიტყვების გამოყენებას პოლიციის თანამშრომლების მისამართით და არ ასრულებდა ბრძანებებს“.

მათი თქმით, კარბაია მოათავსეს იზოლატორში, სადაც მან "თვითდაზიანება სცადა“, შემდეგ კი სამკურნალოდ კლინიკაში გაგზავნეს.

სამინისტროს მტკიცებით, კარბაია მომდევნო დღეს გაათავისუფლეს.

აიაშარა იტყობინება, რომ კარბაია 9 დეკემბერს სოხუმის რესპუბლიკურ საავადმყოფოში გადაიყვანეს, მას შემდეგ, რაც "შეუძლოდ გახდა".

ასევე, გამოცემა წერს, რომ მის გარდაცვალებას "შესაბამისი სამსახურები" იკვლევენ.

DRI-ს ინფორმაციით, ინციდენტში მონაწილე სამი პოლიციელი დაკავებულია. ტელეკომპანია "ფორმულას" ცნობით კი, უწყების ათამდე თანამშრომელი დაიჭირეს.

კარბაიას გარდაცვალების გამო, ქართველი მაღალჩინოსნები აღშფოთებულები არიან.

საქართველოს პრეზიდენტმა სალომე ზურაბიშვილმა დაგმო მისი გარდაცვალება, როგორც "ტრაგიკული შეხსენება, რუსეთის მიერ ოკუპირებულ ტერიტორიებზე ადამიანის საბაზისო უფლებების აშკარა დარღვევის შესახებ“.

საქართველოს პარლამენტის თავმჯდომარემ შალვა პაპუაშვილმა განაცხადა, რომ კარბაიას გარდაცვალება "კიდევ ერთხელ ხაზს უსვამს ოკუპაციის სიმძიმეს და აჩვენებს, თუ რამდენად მნიშვნელოვანია, ოკუპაცია რაც შეიძლება მალე დასრულდეს“.

საქართველოს სახალხო დამცველის ოფისმა ასევე გაავრცელა განცხადება, რომლის მიხედვით, რუსეთი პასუხისმგებელია "საქართველოს მოქალაქის სიცოცხლის უფლების სავარაუდო დარღვევისთვის“.

საქართველოს შინაგან საქმეთა სამინისტრომ რადიო თავისუფლებას განუცხადა, რომ კარბაიას გარდაცვალების ფაქტზე გამოძიება მკვლელობის მუხლით დაიწყო.