კინოსამყაროს დედოფალი ჯადოსნური სამყაროს მეფედ შეიძლება მოგვევლინოს — ლეგენდარული მერილ სტრიპი ნარნიის ქრონიკების ახალ ეკრანიზაციაში ერთ-ერთ მთავარ როლზე განიხილება.

სხვადასხვა გამოცემის ცნობით, ოსკაროსანი ამერიკელი მსახიობი ამჟამად ფილმის შემქმნელებთან მოლაპარაკებების პროცესშია. ფილმში, რომელსაც ნეტფლიქსისთვის ოსკარის ნომინანტი გრეტა გერვიგი იღებს, სტრიპი ასლანის როლზე განიხილება. რადგან ასლანი მამრი ლომია, იგი კაც პერსონაჟად აღიქმება. თანაც, ნარნიის ქრონიკების ავტორის, კლაივ ს. ლუისის, ჩანაფიქრით, ბიბლიური ალეგორიებით სავსე ამბავში ასლანი იესო ქრისტეს სიმბოლოა.

კლასიკად ქცეული ფენტეზი საგის ახალ ეკრანიზაციას ნეტფლიქსზე მომავალი წლის ბოლოსთვის უნდა ველოდოთ, მაგრამ პროექტის შესახებ ამ დროისთვის მაინცდამაინც ბევრი რამ არაა ცნობილი. არც ის არ ვიცით, ვინ ითამაშებს ფილმში, რომელსაც, სავარაუდოდ, ჯადოქრის დისწული ერქმევა და ნარნიის ქრონიკების პირველ წიგნს დაეფუძნება. თუმცა, სტრიპის პოტენციური მონაწილეობის გარდა, ვიცით, რომ თეთრი კუდიანის, ჯადისის, როლზე ბრიტანელი პოპვარსკვლავი Charli XCX განიხილება.

ფოტო: Disney

ჯერ კიდევ 2018 წელს გახდა ცნობილი, რომ ნეტფლიქსი კლაივ ს. ლუისის შვიდწიგნეულის მიხედვით სერიალსა და ფილმს გადაიღებდა. მოგვიანებით, 2023 წელს, ისიც გაირკვა, რომ ნარნიის ქრონიკების ორ ფილმზე გრეტა გერვიგი იმუშავებდა. ამ დროისთვის კი მხოლოდ ის ვიცით, რომ პირველი ფილმი კინოთეატრებში 2026 წლის ნოემბერში გამოვა, დეკემბრისთვის კი ის უკვე ნეტფლიქსის პლატფორმაზეც იქნება ხელმისაწვდომი.

წლების წინ, ნარნიის ქრონიკების მიხედვით დისნეიმაც გადაიღო სამი ფილმი: ლომი, კუდიანი და გარდერობი (2005), პრინცი კასპიანი (2008) და განთიადის დამმორჩილებლის მოგზაურობა (2010). სამივე ფილმმა ჯამში $1,5 მილიარდზე მეტი გამოიმუშავა.

თუ ფილმები შენი ცხოვრების განუყოფელი ნაწილია და მათი განხილვაც გიყვარს, შემოგვიერთდი ჯგუფში ერთი ფილმიც და...