10-13 აპრილს ქარჩხაძის გამომცემლობა ტრადიციულად დაგხვდებათ ექსპო ჯორჯიის XI პავილიონში. თბილისის წიგნის ბაზრობისთვის მზადება მკითხველებისთვის ერთ-ერთი საყვარელი და მნიშვნელოვანი საგაზაფხულო თავგადასავალია. კატალოგების თვალიერება, სიახლეების გაცნობა, სასურველი წიგნების ამორჩევა... ეს სტატია კი ქარჩხაძის გამომცემლობის ყველა წიგნის მოკლე განხილვას გთავაზობთ, თქვენთვის საინტერესო წიგნებს მარტივად საპოვნელად.

თარგმნილი ლიტერატურა

ნდობა ერნან დიასის ნაწარმოებია. პულიცერის პრემიით დაჯილდოებული ეს წიგნი ქარჩხაძის გამომცემლობის ერთ-ერთი მნიშვნელოვანი სიახლეა. ფინანსური სამყაროს ლაბირინთები, მდიდარი ადამიანების იდუმალებით მოცული ცხოვრება, დაკეტილ კარს მიღმა მიღებული გადაწყვეტილებები, ნდობა და გაუცხოება, ცოლქმრული ურთიერთობები, ანუ წიგნში აბსოლუტურად ყველაფერია, რათა მკითხველი მოინუსხოს, დაინტერესდეს და საოცარ ახალ სამყაროში შეაბიჯოს.

ოზის წიგნების სერია. ფრენკ ბაუმის ოზის სამყაროს ეს წიგნები ქარჩხაძის გამომცემლობის ერთ-ერთი ახალი სერიაა. საკულტო, კლასიკად აღიარებული წიგნების ქართულად წაკითხვის შესაძლებლობა პირველად გვაქვს. დოროთი და მისი საყვარელი ძაღლი ტოტო, საფრთხობელა, თუნუქის ტყეკაფია, უზარმაზარი ლომი, თავად ჯადოქარი ოზი, პრინცესა ოზმა და სხვა მრავალი პერსონაჟი ამ საოცარი წიგნების მთავარი გმირები არიან. მათი შეუპოვრობა და მუდმივად ფერადი თავგადასავლები, საოცრებებით სავსე ქვეყნებში დაუღალავი მოგზაურობა და დიდი ჟრიამული ყველა მკითხველს აღაფრთოვანებს.

ოთხი ქარი კრისტინ ჰანას წიგნია, რომელიც ქართველი მკითხველის უდავო რჩეული გახდა. ბესტსელერ წიგნში ავტორი საუბრობს დიდ დეპრესიაზე და სისუსტეებსა თუ სიძლიერეზე, რომელიც საკუთარ თავში შეიძლება მოულოდნელად აღმოვაჩინოთ. დედის სიყვარული და მტკიცე სურვილი, რომ უზარმაზარი გაჭირვების დროსაც კი ყველაფერი გააკეთოს საკუთარი შვილებისთვის.

საკანცელარიო მაღაზია თეირანში მარჯან ქამალის წიგნია, რომელიც ქარჩხაძის გამომცემლობის ერთ-ერთი ბესტსელერი და მკითხველთა რჩეული ნაწარმოებია. წიგნი, ერთი შეხედვით, მარტივად წასაკითხი სასიყვარულო ისტორიაა, თუმცა ავტორი საოცარი ოსტატობით მოგვითხრობს ირანული ტრადიციების, საზოგადოებისა და ქვეყნის ისტორიის შესახებ.

იქ, სადაც კიბორჩხალები მღერიან დელია ოუენსის წიგნია, რომლის სახელიც აუცილებლად გექნებათ ერთხელ მაინც გაგონილი. მკითხველთა უპირობო რჩეული, საოცარი დეტექტივი და ჩახლართული შინაარსის მქონე წიგნი. ამ წიგნის მიხედვით გადაღებულმა ფილმმა დამატებითი ინტერესი გამოიწვია ყველა ასაკის მკითხველში. წიგნი ადამიანებსა და ადამიანობაზე, განმარტოებასა და ბუნებაზე, სიყვარულსა და სიცრუეზე.

უჩინარი რალფ ელისონის ერთ-ერთი ყველაზე ცნობილი ნაწარმოებია. ავტორს წიგნის დაწერამდე ბევრი არავინ იცნობდა, თუმცა წიგნის გამოსვლისთანავე მისი სახელი ამერიკაში ყველამ გაიგო. ნაწარმოები ეროვნულ წიგნის პრემიაზე წარადგინეს, სადაც ასევე წარდგენილი იყო ერნესტ ჰემინგუეის "მოხუცი და ზღვა" და სტეინბეკის "ედემის აღმოსავლეთით". მიუხედავად ასეთი ძლიერი მოწინააღმდეგეებისა, ჯილდო სწორედ "უჩინარმა" მოიპოვა...

ქარჩხაძის გამომცემლობის სტენდთან დაგხვდებათ ჯემალ ქარჩხაძის წიგნებიც: ქარავანი, ზებულონი, მდგმური, იგი, ანტონიო და დავითი. მნიშვნელოვანია იმის აღნიშვნაც, რომ ქართველი მკითხველისთვის ერთ-ერთი საყვარელი, გამორჩეული ნაწარმოები იგი ინგლისურ ენაზეცაა თარგმნილი და სტენდთან მისი შეძენაც იქნება შესაძლებელი. აქვე შეძლებთ შეიძინოთ იგის სერიგრაფიული ტექნიკით შესრულებული ილუსტრაციები და ბრენდირებული ჩანთა.

ლია ლიქოკელის გოგოობის კანონი | დევის ცოლის სიცილი მკითხველთა დიდი თხოვნის შემდეგ ახალი ტირაჟით დაბეჭდილი წიგნია, ავტორისეული სიახლეებით. სინაზითა და მწარე რეალობით სავსე პოეზია ლია ლიქოკელის ლექსების განუყოფელი ნაწილია, ანუ ის, რამაც ქართველი მკითხველი წიგნის გამოსვლისთანავე მოაჯადოვა.

ქარჩხაძის გამომცემლობის სტენდთან დაგხვდებათ ასევე დამხმარე, სასწავლო ლიტერატურა: სპეციალური საჭიროების მქონე მოსწავლეების სწავლება ინკლუზიურ გარემოში, ქართული მწერლობა, ქართული ჰაგიოგრაფია და ჩინეთმცოდნეობის საფუძვლები.

ამ და სხვა წიგნებით დაგხვდებათ ქარჩხაძის გამომცემლობა აპრილის წიგნის ბაზრობაზე, აქვე გთხოვთ გაითვალისწინოთ, რომ გამომცემლობა მაისის წიგნის ფესტივალში მონაწილეობას არ იღებს. გელოდებით 10-13 აპრილს ექსპო ჯორჯიაში.