ოცნების დეპუტატის, ლევან მაჭავარიანის თქმით, 9 აპრილს ოცნების წარმომადგენლები 9 აპრილის მემორიალთან შესაძლოა არ მივიდნენ, რადგან ამან შეიძლება "წივილ-კივილი გამოიწვიოს", მაგრამ დააკონკრეტა, რომ "წივილ-კივილში" არ გულისხმობს პოლიტპატიმრების მშობლებს.

"რა თქმა უნდა, ჩვენი ვალია, რომ ჩვენ გმირებს მივაგოთ პატივი, თუმცა ჩემი პოზიცია არის, რომ თუ ეს [“ოცნების” წარმომადგენლების 9 აპრილის მემორიალთან მისვლა] ხელოვნურად

გამოიწვევს ქუჩაში დაძაბულობას და ხელოვნურად გამოიწვევს ეს ყველაფერი პროცესების იმგვარად წარმართვას, რომ იქ ნაცვლად იმისა, რომ ჩვენს გმირებს პატივი მივაგოთ, იქ ვიღაცების წივილ-კივილი უნდა დაიწყოს..." — თქვა ოცნების დეპუტატმა, ლევან მაჭავარიანმა.

ჟურნალისტის კითხვაზე, პოლიტპატიმრების მშობლებს გულისხმობდა თუ არა "წივილ-კივილში", მაჭავარიანმა დაამატა:

"წივილ-კივილში არ ვგულისხმობ პოლიტპატიმრების მშობლებს, ვგულისხმობ პირდაპირ პარტიულ აქტივს. ნუ ახლა, თუ იქ პროვოკაციებს ექნება მცდელობა, მაგ შემთხვევაში არ ვიცი, ნამდვილად დასაფიქრებელი იქნება, ვინაიდან ეს ჩვენი გმირებისვე შეურაცხყოფა იქნება და ამ შეურაცხყოფის ავანგარდში, რა თქმა უნდა, იდგებიან რადიკალური ოპოზიციის აქტივისტები", — თქვა მაჭავარიანმა.

შეგახსენებთ, რომ დღეს, 8 აპრილს 22:00 საათზე სინდისის პატიმრების მშობლები საპროტესტო აქციას მართავენ. ისინი პარლამენტის წინ ღამეს გაათევენ.