იორკშირის ერთ-ერთი ფერმა სტუმრებს ახალ სერვისს სთავაზობს: თუ სტრესის შემსუბუქება გსურთ, ფერმას შეგიძლიათ ესტუმროთ და ძროხებს ჩაეხუტოთ. ფერმა სტუმრებს ძროხებთან დროის გატარების, მოფერებისა და მათი დავარცხნის უფლებას აძლევს.

როგორც ფერმაში აცხადებენ, ძროხებთან ჩახუტებას თერაპიის მსგავსი ეფექტი აქვს. ძროხებთან დროის გატარებისა და ჩახუტების შემდეგ კი, ბევრმა სტუმარმა თავი უკეთ იგრძნო. ფერმაში დასაქმებულთა თქმით, ზოგიერთი ადამიანს ფისოების და ცუგების მოფერება ამშვიდებს, ზოგს კი — ძროხებთან ჩახუტება.

"აქ ყოფნა ძალიან სასიამოვნოა, ყველა ცხოველი მიყვარს, თუმცა ფუმფულა ცხოველებთან ჩახუტება ყველაზე მაგარი გრძნობაა. ძროხების დავარცხნაც თერაპიას ჰგავდა, არ მეგონა, თუ ამას ვიტყოდი", — ამბობს ფერმის ერთ-ერთი სტუმარი.

ფერმაში მისულ სტუმრებს ძროხების ჩახუტებისა გარდა, საგანმანათლებლო აქტივობებიც ელით, რაც სოფლის მეურნეობის შესახებ ცოდნის მიღებას გულისხმობს. ფერმაში 2-საათიანი ვიზიტის ღირებულება 58 ევროა, დიდი მოთხოვნის გამო კი, ადგილის დაჯავშნა თვეებით ადრე ხდება.

ფერმერებმა სტუმრებისთვის ძროხებთან ჩახუტების შეთავაზება ჯერ კიდევ თებერვლიდან დაიწყეს, როცა აშკარა გახდა, რომ ეკონომიკური სირთულეების გადალახვა უჭირდათ. როგორც ფერმერები იხსენებენ, დღე-ღამეში 14 საათს მუშაობდნენ, თუმცა შემოსავალი მაინც მცირდებოდა. ფინანსური კრიზისის შემდეგ, 2022 წლის იანვარში, ფერმერებს მხოლოდ 5 ძროხა დარჩათ და სტუმრებს სწორედ მათთან ჩახუტება შესთავაზეს.