2023 წლის საბავშვო ევროვიზიის სიმღერის კონკურსი მასპინძელი საფრანგეთის გამარჯვებით დასრულდა. ქვეყნის წარმომადგენელმა ზოი კლოზიურმა, სიმღერით Cœur, ჟიურისა და მაყურებლისგან ჯამში 228 ქულა მიიღო და თავის ქვეყანას საბავშვო ევროფესტივალზე ზედიზედ მეორე (ჯამში კი მესამე) გამარჯვება მოუტანა.

რაც შეეხება საქართველოს, ჩვენი ქვეყნის წარმომადგენელმა ანასტასია ვასაძემ, ნიკოლოზ ხარატმა და ოთო ბაზერაშვილმა 74 ქულით მე-14 ადგილი დაიკავეს. ქართველმა შემსრულებლებმა ევროვიზია ჯუნიორის ფინალში მებო ნუცუბიძისა და ბეთხოს (ირაკლი მანჩხაშვილი) დაწერილი სიმღერა Over The Sky შეასრულეს.

საბავშვო ევროვიზიის რიგით 21-ე კონკურსს წელს საფრანგეთის ქალაქი ნიცა მასპინძლობდა. მასშტაბურ შეჯიბრში ჩართული 16 ქვეყანა წელს სლოგანმა Heroes ("გმირები") გააერთიანა.

საქართველო საბავშვო ევროვიზიაზე მონაწილეთა შორის ერთ-ერთი ყველაზე წარმატებული ქვეყანაა და ამ დრომდე რჩება კონკურსის ერთ-ერთ რეკორდსმენად (უკვე საფრანგეთთან ერთად) სამი გამარჯვებით. ამასთან, ქვეყანამ ევროვიზია ჯუნიორზე ორჯერ დაიკავა მეორე ადგილი და ხუთჯერ მოხვდა საუკეთესო ხუთეულში.

ჯერჯერობით უცნობია, რომელი ქვეყანა უმასპინძლებს საბავშვო ევროვიზიას 2024 წელს.