სნუპ დოგმა თავის ინსტაგრამზე ცოტა ხნის წინ პოსტი გამოაქვეყნა და გულშემატკივრებს შეატყობინა, რომ მოწევისთვის თავის დანებებას აპირებს. "ბევრი ფიქრისა და ოჯახთან საუბრის შემდეგ გადავიწყვიტე, რომ მოწევას თავი დავანებო. გთხოვთ, ამ პერიოდში ჩემს პირად სივრცეს პატივი სცეთ", — წერს ცნობილი რეპერი ინსტაგრამზე.

სნუპ დოგმა განცხადებას ფონად შავ-თეთრი ფოტო დაუდო და ბოლოში თავისი ხელწერაც გამოიყენა. პოსტის შესახებ რეპერს დამატებითი კომენტარი ამ დრომდე არ გაუკეთებია. ფანების ნაწილი კი ფიქრობს, რომ სნუპ დოგი შეიძლება ხუმრობდეს.

"ორი დღის შემდეგ გამოვა და იტყვის, რომ მისი ანგარიში გატეხეს", — წერს ერთ-ერთი მომხმარებელი პოსტის კომენტარებში. გარდა ამისა, ფანებმა ისიც შენიშნეს, რომ განცხადებაში ნათქვამი არ არის რის შეწყვეტაზეა საუბარი. სნუპ დოგი ასე პირდაპირ არ აცხადებს, რომ უარს კანაფზე ამბობს.

სნუპ დოგი კანაფს ხშირად საჯაროდაც ეწეოდა. 2021 წლის MTV Movie Awards-ზე სნუპ დოგი წითელ ხალიჩაზე ხელში "ჯოინთით" გამოჩნდა. ერთ-ერთ ინტერვიუში კი რეპერმა ისიც განაცხადა, რომ დღეში 81 "ჯოინთი" მოუწევია, რაც მისი პირადი რეკორდია.

კანაფის ჯანმრთელობაზე გავლენის შესახებ კვლევები ხშირად ტარდება. მაგალითად, 15 ნოემბერს გამოქვეყნებული, კანადაში ჩატარებული კვლევის მიხედვით, კანაფი, შესაძლოა, ფილტვებსა და სასუნთქ სისტემას უფრო აზიანებს, ვიდრე თამბაქო. ასევე, კოლუმბიის უნივერსიტეტში მომუშავე მეცნიერებმა ახალი კვლევის ფარგლებში დაადგინეს, რომ კანაფის პროდუქტების მომხმარებლებს ორგანიზმში მძიმე მეტალების, კადმიუმისა და ტყვიის მაღალი დონე აღენიშნებათ. გარდა ამისა, მეცნიერები ვარაუდობენ, რომ კანაფის ხშირი მოხმარება შესაძლოა, გულის დაავადებების რიკს 34%-ით ზრდიდეს.