პარლამენტმა საქართველოს პარლამენტის რეგლამენტში ცვლილების შეტანის შესახებ პროექტი პირველი მოსმენით, 85 ხმით ერთხმად მიიღო.

  • კანონპროექტი, რომელიც 2025 წლის 1 იანვრიდან პარლამენტის წევრის შრომის ანაზღაურების ოდენობის შეცვლას ითვალისწინებს, პარლამენტის თავმჯდომარე შალვა პაპუაშვილმა წარადგინა.
  • ცვლილება ამ მოწვევის პარლამენტის წევრებს არ შეეხება და ძალაში 2025 წლის 1 იანვრამდე შევა.

რას ითვალისწინებს პროექტი: პაპუაშვილის განცხადებით, 2017-2018 წლებში გატარებული საჯარო სამსახურის რეფორმის ფარგლებში, საჯარო სამსახურში დასაქმებული თანამშრომლებისთვის ანაზღაურების სხვადასხვა კოეფიციენტი დაწესდა.

  • საჯარო სამსახურის შესახებ კანონით, ასევე, დადგინდა ანაზღაურების კოეფიციენტები პარლამენტის წევრებისთვის, სადაც კოეფიციენტები 8000-დან 10 000 ლარამდე განისაზღვრა.
  • პაპუაშვილი ამბობს, რომ 2017 წელს პარლამენტის წევრების ანაზღაურებას ეს მიდგომა არ შეხებია და შედეგად, ბოლო 10 წელია, 2013 წლიდან პარლამენტის წევრების ანაზღაურება არ შეცვლილა.
  • "დღეს აპარატში, დაახლოებით, 50 თანამშრომელს უფრო მაღალი ხელფასი აქვს, ვიდრე პარლამენტის წევრებს", — განაცხადა შალვა პაპუაშვილმა.
  • მან განმარტა, რომ ანაზღაურების კონკრეტული ციფრები შესაბამისი კოეფიციენტებით შეიცვალა და "წარმოდგენილი პროექტის თანახმად, 7-დან 8.5-მდე კოეფიციენტი დადგინდა."

ბოლო ხაზი: რეგლამენტის წარმოდგენილი ცვლილებები ერთჯერად ანაზღაურებასაც შეეხება, სადაც პარლამენტის წევრის ბუნებრივ ან თავდასხმის შედეგად გარდაცვალების შემთხვევაში გასაცემი კომპენსაციის ოდენობა განისაზღვრება.