არასამთავრობო ორგანიზაცია საერთაშორისო გამჭვირვალობა — საქართველო (TI) წერს, რომ 1 ივლისიდან 30 სექტემბრის ჩათვლით, ყველა პოლიტიკური პარტიის შემოწირულებების ჯამი, 1 901 299 ლარია, აქედან ყველაზე მეტი — 1 238 000 ლარი ქართულმა ოცნებამ მიიღო.

ვინ არიან მმართველი პარტიის შემომწირველები: TI-ის ინფორმაციით, შემომწირველების უმეტესობა ღვინის, ან სხვა ალკოჰოლური სასმელების მწარმოებელ კომპანიებთან დაკავშირებული პირები იყვნენ.

• მეღვინე დონორებმა, ჯამში, აგვისტო-სექტემბერში, ოცნებას 944 000 ლარი შესწირეს.
• 2012 წლიდან კი, მმართველი პარტიის სასარგებლოდ, მათ 2 მლნ ლარზე მეტი აქვთ გაღებული.

რა სანაცვლო სარგებელს იღებენ ალკოჰოლის მწარმოებლები: შემომწირველებთან დაკავშირებულ ღვინის მწარმოებელ კომპანიებს,

• 2013 წლიდან, 4 მილიონზე მეტი ლარის გამარტივებული შესყიდვების კონტრაქტები აქვთ მიღებული,
• 2013-2021 წლებში კი — 14 მილიონი ლარის შეღავათიანი აგროკრედიტები,
• ხოლო 2021-2022 წლებში 17 მილიონ ლარზე მეტი სუბსიდია.

მეღვინე დონორებმა, TI-ს ინფორმაციით, სწორედ 2023 წლის რთვლის წინა პერიოდში გაიღეს შეწირულობა.

• ამ სექტორის სუბსიდირებისთვის, სახელმწიფო ბიუჯეტში, 60 მილიონ ლარზე მეტია გამოყოფილი.
• შემომწირველებთან დაკავშირებული კომპანიებიდან 15 ჩართულია რთვლის სუბსიდირების პროგრამაში.

შემომწირველი კომპანიები რუსულ ბაზარზე: TI საინფორმაციო ბიულეტენში აღნიშნავს, რომ მრავალმილიონიანი სუბსიდიების ფონზე, შემომწირველებთან დაკავშირებული, სულ მცირე, სამი კომპანია, ასკანელი ძმები, წინანდლის ძველი მარანი და ქართული ღვინის სახლი, 2022 წელს იმ ღვინის მწარმოებელ კომპანიებს შორის იყვნენ, რომლებმაც ყველაზე მეტი ღვინო გაიტანეს რუსეთში ექსპორტზე.

"ქართული ღვინის რუსულ ბაზარზე მაღალი დამოკიდებულება საფრთხის შემცველია, რადგან რუსეთი ამას პოლიტიკური ზეწოლის ბერკეტად იყენებს. საერთაშორისო გამჭვირვალობა - საქართველომ უკვე გაავრცელა რეკომენდაცია, სადაც საქართველოს მთავრობას მოუწოდებს, ისეთი კომპანიების სუბსიდირება შეწყვიტოს, რომლებიც საქართველოს რუსეთზე ეკონომიკურ დამოკიდებულებას ზრდიან",— აღნიშნავს საერთაშორისო გამჭვირვალობა — საქართველო.

გამარტივებული შესყიდვები ოცნების შემწირველებისთვის:

TI-ის ცნობით, ამ კომპანიებს, საანგარიშო პერიოდში, სახელმწიფო შესყიდვების კონტრაქტები, ფაქტობრივად არ მიუღიათ, თუმცა 2013 წლიდან, 4 მილიონი ლარზე მეტი ღირებულების 1700 გამარტივებული შესყიდვის ხელშეკრულება აქვთ მიღებული.

მათგან:

• 1 მილიონ ლარამდე პაატა ცისკარიშვილთან დაკავშირებულმა კომპანიამ შპს თელავის მარანმა მიიღო;
• 800 ათასზე მეტი — ზურაბ დეკანოზიშვილთან დაკავშირებულმა შპს საამომ;
• ხოლო 760 ათასამდე ლარის ოდენობის კონტრაქტი — არჩილ ლობჟანიძესთან დაკავშირებულმა შპს კომპანია ბესინიმ.

ამას გარდა, ზემოაღნიშნულ დონორებთან დაკავშირებული ალკოჰოლური სასმელების კომპანიების ნაწილს, 2013-2021 წლებში,

• 12 მილიონამდე ლარის შეღავათიანი აგროკრედიტი
• და 2021-2022 წლებში — 12 მილიონ ლარზე მეტი ოდენობის სუბსიდია აქვთ მიღებული.

TI წერს, რომ ქართული ოცნების დონორების ანალიზმა გააჩინა ეჭვი, რომ მათი ნაწილი ფიქციური შემომწირველია და ისინი პარტიას არა საკუთარ თანხებს, არამედ — მათი დამსაქმებელი კომპანიების თანხებს სწირავენ.

მაგალითად:

• სარაჯიშვილის მთავარმა ბუღალტერმა, გიორგი ბუბუტეიშვილმა, ქართულ ოცნებას 15000 ლარი შესწირა, ამავე კომპანიის მთავარმა ტექნოლოგმა, დავით აბზიანიძემ, მმართველი პარტიისთვის 35000 ლარი გაიღო.
• 30000 ლარი შესწირა ქართულ ოცნებას ღვინის კომპანია ფალავანის მთავარმა მეღვინემ, ირაკლი ნანეიშვილმა.

"ქართული კანონმდებლობით აკრძალულია სხვა პირის მეშვეობით პარტიისთვის თანხის შეწირვა, ასეთი ქმედება პირის შემოწირულების ორმაგი ოდენობით დაჯარიმებით ისჯება", — წერს საერთაშორისო გამჭვირვალობა — საქართველო.