რა ხდება: პროკურატურამ 19 პირს, რომელიც გუშინ შსს-მ ე.წ. ქურდულ სამყაროსთან კავშირისთვის დააკავა, ბრალი წარუდგინა.

დეტალები: მათგან ექვსს ბრალდება ქურდული სამყაროს წევრობისთვის წარედგინა, ხუთს — ქურდული სამყაროს საქმიანობის მხარდაჭერისთვის, რვას კი — კანონიერი ქურდისთვის მიმართვის გამო.

კონტექსტი: გუშინ შსს-მ გაავრცელა ინფორმაცია, რომ ეს პირები, მოქალაქეებს შორის არსებული ფინანსური დავების მოგვარების და პირადი სარგებლის მიღების მიზნით, საზღვარგარეთ მყოფ კანონიერ ქურდებს უკავშირდებოდნენ.

  • კანონიერი ქურდების — რუსლან გეგეჭკორის, თენგიზ ხოფერიას, ჯეირან კინწურაშვილის, რევაზ მორჩილაძისა და პაატა ბაქრაძის დავალებით, ე.წ. ქურდული გარჩევები ეწყობოდა, რომლებსაც მოდავე მხარეებიც ესწრებოდნენ.
  • ბრალდებულები გადაწყვეტილებებს იღებდნენ და ერთ-ერთ მოდავე მხარეს აკისრებდნენ გადაეხადა გარკვეული თანხა როგორც მათთვის, ასევე — მეორე მხარის სასარგებლოდ, უარის შემთხვევაში კი, მას სიტყვიერ და ფიზიკურ შეურაცხყოფას აყენებდნენ.
  • პოლიციამ დაკავებულების სახლებიდან ამოიღო ცეცხლსასროლი იარაღები, მჭიდები, ვაზნები, ნარკოტიკული საშუალება მარიხუანა, ფული, კომპიუტერული ტექნიკა და მობილური ტელეფონები, რომელთა საშუალებითაც ისინი ერთმანეთს და საზღვარგარეთ მყოფ კანონიერ ქურდებს უკავშირდებოდნენ.