რა ხდება: შსს-მ, გენერალურ პროკურატურასთან ერთად ჩატარებული გამოძიების შედეგად, თბილისში, აჭარაში, გურიაში, სამეგრელოსა და შიდა ქართლში 18 პირი დააკავა.

  • შინაგან საქმეთა სამინისტროს ინფორმაციით, 6 პირი ქურდული სამყაროს წევრობის ფაქტზე, 5 — ქურდული სამყაროს საქმიანობის მხარდაჭერის ფაქტზე, 7 კი — კანონიერი ქურდისთვის და ქურდული სამყაროს წევრისთვის მიმართვის ფაქტზე დააკავეს.

დეტალები: შსს-ს ინფორმაციით, დადგინდა, რომ ეს პირები, მოქალაქეებს შორის არსებული ფინანსური დავების მოგვარების და პირადი სარგებლის მიღების მიზნით, საზღვარგარეთ მყოფ კანონიერ ქურდებს უკავშირდებოდნენ.

  • კანონიერი ქურდების — რუსლან გეგეჭკორის, თენგიზ ხოფერიას, ჯეირან კინწურაშვილის, რევაზ მორჩილაძისა და პაატა ბაქრაძის დავალებით, ე.წ. ქურდული გარჩევები ეწყობოდა, რომლებსაც მოდავე მხარეებიც ესწრებოდნენ.
  • ბრალდებულები გადაწყვეტილებებს იღებდნენ და ერთ-ერთ მოდავე მხარეს აკისრებდნენ გადაეხადა გარკვეული თანხა როგორც მათთვის, ასევე — მეორე მხარის სასარგებლოდ, უარის შემთხვევაში კი, მას სიტყვიერ და ფიზიკურ შეურაცხყოფას აყენებდნენ.
  • პოლიციამ დაკავებულების სახლებიდან ამოიღო ცეცხლსასროლი იარაღები, მჭიდები, ვაზნები, ნარკოტიკული საშუალება “მარიხუანა”, ფული, კომპიუტერული ტექნიკა და მობილური ტელეფონები, რომელთა საშუალებითაც ისინი ერთმანეთს და საზღვარგარეთ მყოფ „კანონიერ ქურდებს“ უკავშირდებოდნენ.
  • მათი დანაშაულები 15 წლამდე ვადით თავისუფლების აღკვეთას ითვალისწინებს.