რა ხდება: ღაზის უდიდესი საავადმყოფო, ალ-შიფა, რომელიც ელექტროენერგიის და საწვავის გარეშე დარჩა, თითქმის სასაფლაოდ არის ქცეული, ამის შესახებ ჯანდაცვის მსოფლიო ორგანიზაცია აცხადებს.

• საავადმყოფოს ხელმძღვანელის თქმით, ტერიტორია ოთხივე მხრიდან ბლოკირებულია და მის სიახლოვეს ინტენსიური ბრძოლები მიმდინარეობს. კლინიკის ჭიშკართან ახლოს ტანკები დგას.

რას ამბობს ისრაელი: ის ამტკიცებს, რომ ჰამასის მნიშვნელოვანი ობიექტები სწორედ საავადმყოფოს ქვეშ, გვირაბში მდებარეობს, რასაც უარყოფს საავადმყოფო და ჰამასი.

• ასევე, ისრაელის თქმით, საავადმყოფო ალყაში არ არის და სურვილის შემთხვევაში, ყველას შეუძლია ტერიტორიის დატოვება.

რა ვითარებაა ახლა ალ-შიფაში: ჯანმოს წარმომადგენლის, კრისტიან ლინდმეიერის თქმით, საავადმყოფოში 600 პაციენტი რჩება, დანარჩენები კი დერეფნებს აფარებენ თავს.

• "საავადმყოფოს გარშემო გვამებია, რომლების დამარხვა, ან მორგში გადაყვანა ვერ ხერხდება, საავადმყოფო აღარ მუშაობს, ის, თითქმის, სასაფლაოდ არის ქცეული", — თქვა ლინდმეიერმა.
• ღაზის ჯანდაცვის სამინისტროს ინფორმაციით, საავადმყოფოში 2300-მდე ადამიანი რჩება, მათგან 650 პაციენტია, 200-დან 500-მდე — კლინიკის თანამშრომელი, დაახლოებით, 1500 კი — დევნილი, რომელიც შენობას აფარებს თავს.
• ალ-შიფას მენეჯერი, აბუ სელმია ამბობს, რომ გვამების დამარხვის საშუალებას ისრაელელები არ აძლევენ.

მძიმე მდგომარეობაში აღმოჩნდნენ ნაადრევად დაბადებული ბავშვები, რომლებსაც, ელექტროენერგიის არქონის გამო, ინკუბატორები გამოერთოთ.

• სელმიას თქმით, ჟანგბადის ნაკლებობის გამო, უკვე 7 ახალშობილი დაიღუპა.
• მისივე ინფორმაციით, ისრაელთან მიმდინარეობა მოლაპარაკება, რომ ჩვილების ევაკუაცია მომხდარიყო, თუმცა, შეთანხმებას ვერ მიაღწიეს.
• ისრაელის პრემიერ-მინისტრის, ბენიამინ ნეთანიაჰუს მრჩეველი, მარკ რეგევი კი აცხადებს, რომ ისრაელი მათ სთავაზობდა "პრაქტიკულ გამოსავალს" ბავშვების ევაკუაციისთვის, თუმცა ჰამასმა შეთავაზება არ მიიღო.
• "ისინი არ იღებენ ჩვენ მიერ შეთავაზებულ საწვავს, გენერატორებისთვის. მათ არ სურთ ახალშობილების გადაყვანა სასწრაფო დახმარების მანქანით. ხალხი იქ [საავამდყოფოში] იმიტომ არის ჩარჩენილი, რომ ჰამასს მეტი საშინელი ფოტოს გავრცელება აწყობს", — თქვა რეგევმა.
• მან, ასევე, დაადანაშაულა ჰამასი საავადმყოფოს "ომის ზონად" გადაქცევაში, რადგან გვირაბები მის ქვეშ ააშენეს. ჰამასი უარყოფს ალ-შიფას გამოყენებას საკუთარი ოპერაციებისთვის, ექიმები კი ამბობენ, რომ კლინიკაში ჰამასის წევრები არ იმყოფებიან.

კონტექსტი: ისრაელმა ღაზის დაბომბვა 7 ოქტომბერს დაიწყო, მას შემდეგ, რაც ჰამასი მის ტერიტორიაზე შეიჭრა და 1200 ადამიანი მოკლა, 200-ზე მეტი ტყვედ წაიყვანა.

• ღაზის ჯანდაცვის სამინისტროს განცხადებით, 7 ოქტომბრის შემდეგ ომს 11 ათასზე მეტი პალესტინელი ემსხვერპლა, მათგან 4500-ზე მეტი ბავშვია.