კენდალ ჯენერს, როგორც ჩანს, სამზარეულოსთან ურთიერთობა კვლავაც უჭირს. ცნობილმა ამერიკელმა მოდელმა და ტელევარსკვლავმა ინტერნეტის ყურადღება ამჯერად იმით მიიქცია, რომ ნამცხვრის დაჭრა გაუჭირდა.

უთუოდ გემახსოვრებათ მსგავსი ამბავი, რომელიც გასულ წელს მოხდა — მაშინ ჯენერმა კიტრი ვერ დაჭრა, რის გამოც "რეალობას მოწყვეტილიც" კი უწოდეს. თუმცა, მოდელს ინტერნეტმომხმარებლების გამოხმაურება გულთან ახლოს სულაც არ მიუტანია, პირიქით — ხუმრობას თავადაც აჰყვა და შარშანდელ ჰელოუინზე კიტრის ფორმაში გამოეწყო.

კიტრის შემდეგ კი სტაფილოს ნამცხვრის ჯერი დადგა. ჯენერის ოჯახის რეალითი შოუს, The Kardashians-ის, ცოტა ხნის წინანდელ ეპიზოდში კენდალის ცხენს კვიცი შეეძინა. ამის აღსანიშნავად მოდელს ოჯახის წევრები ესტუმრნენ. ყველაფერი კი მას შემდეგ დაიწყო, რაც კენდალმა დედამისის, კრის ჯენერის, მიტანილ ნამცხვარზე სანთელი ჩააქრო.

"ეს სტაფილოს ნამცხვარია? ცოტას შევჭამდი", — გამოაცხადა მოდელმა და ნამცხვრის დასაჭრელად შესაფერისი იარაღის მოსაძებნად სამზარეულოს მიაშურა.

ფოტო: Hulu

"რომელი დანა უნდა გამოვიყენო? ეს გამომადგება?", — ამ შეკითხვაზე მოდელმა ტორტზე კრემის წასასმელი ნიჩაბი მოიმარჯვა, მაგრამ საბოლოოდ არჩევანი მაინც მოზრდილ დანაზე შეაჩერა.

ფოტო: Hulu

თუმცა, საქმე არც ამის მერე წასულა უკეთესად. კენდალს მოჭრილი ნამცხვრის აღება გაუჭირდა და თავის ოჯახს შესჩივლა.

"რა გავაკეთე არასწორად? ვერ ვიღებ...".

საბოლოოდ, მოდელმა ძლივს მოჭრილი ნამცხვარი თეფშზე დაიგულა. თუმცა, როგორც კენდალის დამ, ქლოი კარდაშიანმა შენიშნა, "სამზარეულო მისთვის უსაფრთხო ადგილი ნაღდად არაა".

ფოტო: Hulu

კარდაშიან-ჯენერების რეალითი შოუ სტრიმინგ პლატფორმა Hulu-ზე მეოთხე სეზონით სექტემბრის ბოლოს დაბრუნდა. ამ გადაცემამდე ოჯახს სხვა რეალითი შოუ, Keeping up with the Kardashians, ჰქონდა, რომელსაც 20 სეზონის განმავლობაში მილიონობით ადამიანი ადევნებდა თვალს.

კენდალ ჯენერს კი ხშირად უსაუბრია, რომ თავისი დებისგან განსხვავებით, პოპულარობასთან შეგუება გაუჭირდა. რამდენიმე თვის წინ, ერთ-ერთ ინტერვიუში მოდელმა აღნიშნა, რომ საკუთარ ოჯახში "თავი უცხოდ უგრძნია" და "ასეთი ცხოვრება არ აურჩევია".

"მესმის, რომ დები კარდაშიანების ქოლგის ქვეშ მოვყევი, მაგრამ ჩემთვის ეს უჩვეულოა", — ამატებს ტელევარსკვლავი, რომელიც უკვე წლებია, მსოფლიოში ყველაზე მაღალანაზღაურებად მოდელად სახელდება.

ასევე იხილეთ: