2015 წელს Pixar-მა ორიგინალური ანიმაცია Inside Out შექმნა, რომელმაც დიდი მოწონება დაიმსახურა. ახლა კი მაყურებელი Inside Out 2-ს იხილავს, რომელშიც კარგად ნაცნობი პერსონაჟების გარდა ახალ ემოციას — შფოთვას გავიცნობთ. Inside Out 2-ის ტრეილერი უკვე გამოვიდა და აშკარაა, რომ მაყურებლისთვისაც მალე ყველაფერი თავდაყირა დადგება.

Inside Out მოზარდი გოგოს, სახელად რაილის, ცხოვრების შესახებ გვიყვება, რომელიც ანიმაციის მეორე ნაწილში უკვე 13 წლისაა. Inside Out გამორჩეული და ორიგინალური იმითაა, რომ ანიმაციის ძირითადი სიუჟეტი რაილის ტვინში ვითარდება, სადაც არაერთ ემოციას, როგორც პერსონაჟს, ისე ვეცნობით.

რაილის ტვინში ხუთი ემოცია — სევდა, ბედნიერება, სიბრაზე, შიში და ზიზღი — თითოეულ ნაბიჯს აკონტროლებს და რაილის შესაბამის ქმედებებსაც კარნახობს. Inside Out 2-ში კი ნაცნობ ემოციებს შფოთვასთან უწევთ შეხვედრა, რომელიც აშკარაა, რომ არსად წასვლას არ აპირებს. როგორ განვითარდება მოვლენები, ამას სულ მალე ვნახავთ.

Inside Out 2-ის პრემიერა 2024 წლის 14 ივნისს იგეგმება.