რა ხდება: 2023 წლის 3 ნოემბერს ოპერისა და ბალეტის 37 თანამშრომელი გაიფიცა 500-ლარიანი ხელფასის ზრდის მოთხოვნით.

რას ითხოვენ: ხელფასების 100%-იან ზრდასა და ორი გათავისუფლებული თანამშრომლის აღდგენას.

  • "გამაოგნებელია გაფიცული თანამშრომლების ხელფასის მიზერული ოდენობა, რომელიც მზარდი ფასებისა და ინფლაციის პირობებში, 600 ლარს არ აღემატება, ამასთან, გაფიცულთა განცხადებით, შეუქცევადად იზრდება მათი სამუშაო დატვირთვა", — აცხადებს ღირსეული შრომის პლატფორმა.
  • მათივე ცნობით, ოპერის თეატრის თანამშრომლებმა გაფიცვას მიმართეს კანონის მოთხოვნების სრული დაცვით.
  • ამას რამდენიმე თანამშრომლის გათავისუფლება მოჰყვა, რაც "კიდევ უფრო ამძიმებს ოპერის თეატრის ადმინისტრაციის პასუხისმგებლობას."

დღეს, 6 ნოემბერს, აქციის მეოთხე დღეა. გაფიცულებს შეუერთდა კინემატოგრაფისტთა პროფესიული კავშირი.

თეატრის პოზიცია: ისინი "დეზინფორმაციას" უწოდებენ გავრცელებულ ცნობას, თანამშრომლების ანაზღაურების შესახებ: "თეატრის სცენის სამსახურში დასაქმებული პირების არსებული, ყოველთვიური მინიმალური შრომის ანაზღაურება 650 ლარია, ხოლო მაქსიმალურია 1350 ლარი", — აცხადებენ ისინი.

ბოლო ხაზი: ღირსეული შრომის პლატფორმა მოუწოდებს ოპერისა და ბალეტის თეატრის ადმინისტრაციას, დაუყოვნებლივ შეასრულოს მშრომელთა ბაზისური მოთხოვნები, გაზარდოს ხელფასი, დაემორჩილოს კანონმდებლობის მოთხოვნებს და სამსახურში აღადგინოს უკანონოდ გათავისუფლებული თანამშრომლები.