ეიფორიის ამომავალი ვარსკვლავი, ანგუს კლაუდი, რომელიც სერიალში ფეზკოს როლს თამაშობდა, 2023 წლის 31 ივლისს 25 წლის ასაკში გარდაიცვალა. მან კარიერის ერთ-ერთი ბოლო როლი თრილერის ჟანრის ფილმში Your Lucky Day ითამაშა, რომლიდან ნაწყვეტიც სულ ცოტა ხნის წინ გავრცელდა. ფილმი მთავრდება წარწერით "ანგუსისთვის".

ფილმის სცენა იმით იწყება, რომ იღბლიანი მომხმარებელი ლატარიაში $156 მილიონს მოიგებს, ამას კი მაღაზიაში მყოფი ფეზკოს პერსონაჟი გაიგებს და იღბლიანი ბილეთის მოპარვას გადაწყვეტს. ის ირგვლივ მყოფებს მძევლებად აიყვანს და ფილმის სიუჟეტიც სწორედ ამ ფაქტის გარშემო ვითარდება.

ფილმის სცენარისტი და რეჟისორი, დენიელ ბრაუნი ამბობს, რომ პერსონაჟი, რომლის როლსაც ანგუსი ასრულებს, მას პიროვნულადაც ჰგავდა — ფეთქებადი ხასიათით, თუმცა კეთილი გულითაც. ეს სცენარისტისა და რეჟისორის პირველი სრულმეტრაჟიანი ფილმია.

გადაღებები ლოს-ანჯელესში მხოლოდ 16 დღის განმავლობაში მიმდინარეობდა. ბრაუნი ამბობს, რომ მას შემდეგ, რაც ეიფორიაში კლაუდის შესრულება ნახა, გადაწყვიტა, ფილმში მთავარი როლი სწორედ მას მოერგო.

"ანგუსის სიკვდილი წარმოუდგენელი დანაკარგია. მას ჯერ კიდევ უამრავი რამ ჰქონდა გასაკეთებელი. მინდოდა, ის მეტ ფილმში მენახა. იმედი მაქვს, ადამიანები მის ფილმებს ნახავენ და დააფასებენ, რამდენად ნიჭიერი იყო", — ამბობს რეჟისორი.

ფილმის პრემიერა აშშ-ის კინოთეატრებში 10 ნოემბერს შედგება.

იხილეთ ასევე: