ეიფორიის ვარსკვლავი ანგუს კლაუდი, რომელიც სერიალში ფეზკოს როლს თამაშობდა, 25 წლის ასაკში გარდაიცვალა. მსახიობის გარდაცვალებას სოციალურ ქსელში სერიალის რეჟისორი და მსახიობები გამოეხმაურნენ, მათ შორის, ზენდეია, ალექსა დემი, სიდნი სვინი, ბარბი ფერეირა და სხვები.

მსახიობის გარდაცვალების შესახებ განცხადება მისმა ოჯახმა გამოაქვეყნა. განცხადების მიხედვით, ანგუსს 1 კვირის წინ მამა გარდაეცვალა, რაც მსახიობისთვის განსაკუთრებულად მძიმე აღმოჩნდა. ჯერჯერობით გარდაცვალების მიზეზი ოფიციალურად დადასტურებული არ არის.

ზენდეია, რომელიც სერიალში ფეზკოს საუკეთესო მეგობრის როლს ასრულებს, ანგუსს სოციალური ქსელით გამოემშვიდობა და მის ოჯახს უთანაგრძნო.

"სიტყვები ვერ გადმოსცემს ანგუსის უსასრულო სილამაზეს. ძალიან იღბლიანი ვარ, რომ სიცოცხლეში მომეცა შანსი, ის გამეცნო, მისთვის ძმა დამეძახა, მენახა მისი თბილი, კეთილი თვალები და ნათელი ღიმილი და მისი გადამდები სიცილისთვის მომესმინა (ამის გახსენებაზე ახლაც მეღიმება).

ვიცი, რომ ადამიანები ხშირად იყენებენ ამ ფრაზას, რათა აღწერონ ადამიანი, რომელიც უყვართ — "ნებისმიერი ოთახის განათება შეეძლო, რომელშიც შევიდოდა", მაგრამ დარწმუნებით შემიძლია გითხრათ, რომ ანგუსს ეს ყველაზე უკეთ გამოსდიოდა. მინდა, ის ასე მახსოვდეს. იმ უსაზღვრო სინათლის, სიყვარულისა და სიხარულისთვის, რომელსაც ყოველთვის გვაძლევდა, ყოველი წამი მემახსოვრება.

ჩემი გული ამ რთულ დროს მის დედასთან და ოჯახთანაა. გთხოვთ, კეთილები და მომთმენები იყავით, რადგან მწუხარებას ყველა განსხვავებულად გამოხატავს", — წერს ზენდეია.

მსახიობი სიდნი სვინი ინსტაგრამზე ანგუსთან ერთად ფოტოების სერიას აქვეყნებს და ამბობს, რომ სიტყვების პოვნა უჭირს.

"ანგუს, შენ ყველაზე კეთილი გული გქონდა და ყველა ოთახს სიცილით ავსებდი. ეს ყველაზე ძნელი რამეა, რაც კი ოდესმე დამიპოსტავს და სიტყვების პოვნა მიჭირს. იმაზე მეტად მოგვენატრები, ვიდრე იფიქრებდი, მაგრამ ძალიან იღბლიანი ვარ, რომ ცხოვრებაში შენი გაცნობის საშუალება მქონდა.

დარწმუნებული ვარ, ნებისმიერი ადამიანი, ვინც კი შეგხვედრია, იმავეს იტყვის. ეს გულისტკივილი რეალურია. ნეტავ, კიდევ ერთხელ შემძლებოდა, ჩაგხუტებოდი. მთელ ჩემს სიყვარულს გიგზავნი", — წერს სიდნი.

მსახიობი ჯავონ უოლტონი, რომელიც სერიალში ფეზკოს უმცროსი ძმის როლს ასრულებდა, სოციალურ ქსელში ფოტოს აქვეყნებს წარწერით "სამუდამო ოჯახი".

მსახიობის გარდაცვალებას HBO-ც გამოეხმაურა:

"ძალიან დამწუხრებული ვართ ანგუს კლაუდის გარდაცვალებით. ის HBO-ს და ეიფორიის ოჯახის ძვირფასი წევრი და განუზომლად ნიჭიერი ადამიანი იყო. ამ რთულ დროს მისი მეგობრებისა და ოჯახის წევრების მწუხარებას ვიზიარებთ".

ანგუსი ეიფორიაში ნარკოტიკებით მოვაჭრე ფეზკოს როლს ასრულებდა, რომლითაც მაყურებელს თავი ძალიან მალე შეაყვარა. აღსანიშნავია, რომ ანგუსი კასტინგის აგენტმა ქუჩაში შენიშნა — სწორედ ასე აღმოჩნდა ის თანამედროვეობის ერთ-ერთ პოპულარულ სერიალში.

კლაუდი ბოლო ინტერვიუებში მომავალ პროექტებზე აღფრთოვანებით საუბრობდა, თუმცა იმასაც ამბობდა, რომ ჰოლივუდურ წარმატებაზე მეტად გარკვეული დროის შემდეგ მშობლიურ მხარეში დაბრუნება უნდოდა.