ნეტფლიქსის ცნობილი სერიალის, Brıdgerton-ის, მსახიობი რუბი ბარკერი, რომელიც შოუს პირველ და მეორე სეზონებში მარინას როლს ასრულებდა, ნეტფლიქსს გულგრილობაში ადანაშაულებს. ბარკერის თქმით, კომპანია მისი მენტალური ჯანმრთელობის მდგომარეობით არ დაინტერესებულა, როცა მსახიობს გადასაღებ მოედანზე ორჯერ, 2019 და 2022 წლებში, ფსიქოტური ეპიზოდები ჰქონდა.

"ნეტფლიქსიდან ერთი ადამიანიც კი არ დაინტერესებულა ჩემი მდგომარეობით, მას შემდეგ, რაც ფსიქოტური ეპიზოდები მქონდა. ერთ ადამიანსაც კი არ მოუწერია ან უკითხავს, როგორ ვიყავი ან დახმარება ხომ არ მჭირდებოდა. არავის", — ამბობს რუბი.

ბარკერის თქმით, მისი მენტალური ჯანმრთელობის მდგომარეობის გაუარესება გადაღებებმა გამოიწვია, რადგან სერიალში მისი პერსონაჟი ძალიან ჩაკეტილი და სამყაროსგან გარიყული იყო — შოუში მარინას პერსონაჟი ქორწინების გარეშე დაორსულდება, რის გამოც მას ყველა ზურგს შეაქცევს.

რუბის თქმით, პირველი ფსიქოტური ეპიზოდის შემდეგ საავადმყოფოში ფარულად მისვლა დასჭირდა, რადგან მის მდგომარეობას შოუს რეპუტაციაზე ცუდი გავლენა არ მოეხდინა. ბარკერი აღნიშნავს, რომ ძალიან ცდილობდა, ისე მოქცეულიყო, თითქოს, კარგად იყო და მუშაობა ჩვეულებრივ გაეგრძელებინა, თუმცა შოუს წარმატებასთან ერთად მისი ცხოვრება რადიკალურად შეიცვალა, რაც მასზე უარყოფითად მოქმედებდა, ნეტფლიქსს კი მისი მდგომარეობა არ აღელვებდა.

ბარკერი გამომწერებს თავისი მენტალური ჯანმრთელობის შესახებ პირველად 2022 წლის მაისში ესაუბრა, როცა ინსტაგრამზე პოსტი გამოაქვეყნა და თქვა, რომ იმ წუთებშიც საავადმყოფოში იყო და როგორც იქნა, დიაგნოზი დაუსვეს.

მისი თქმით, Bridgerton-ის გადაღებებიდან მოყოლებული წლების განმავლობაში თავს ძალიან ცუდად გრძნობდა და მიუხედავად იმისა, რომ წარმატებისთვის შოუს მადლიერია, მაინც გაბრაზებულია, რომ მათგან ვერანაირი მხარდაჭერა ვერ მიიღო.

ცოტა ხნის წინ მიცემულ ინტერვიუში რუბიმ შოუს გადაღების პერიოდი გაიხსენა და თქვა, რომ მაშინაც, როცა მისი მენტალური ჯანმრთელობა უარესდებოდა, ისეთი შეგრძნება ჰქონდა, რომ თავზე იარაღი მიაბჯინეს და უთხრეს, რომ სერიალის რეკლამა უნდა გაეკეთებინა და თუ თავის მდგომარეობაზე ისაუბრებდა, ყველაფერს გააფუჭებდა.