ახლახან პერის ჰილტონმა ინსტაგრამზე თავისი 8 თვის შვილის, ფენიქსის, ფოტო გამოაქვეყნა. შვილის ფოტოების შესახებ პერის ჰილტონს კომენტარის გაკეთება მალევე მოუწია. ამის მიზეზი ისაა, რომ 8 თვის პატარა შეურაცხმყოფელი კომენტარების სამიზნე გახდა და სოციალური ქსელის მომხმარებლები ბავშვის თავის ზომაზე უხეშად საუბრობდნენ.

"როცა საზოგადოების ყურადღების ცენტრში ხარ, კომენტარებს თავიდან ვერ აიცილებ, მაგრამ ასეთ კონტექსტში ჩემი ან სხვისი შვილის მიზანში ამოღება გაუმართლებელია. ასეთი კომენტარები იმაზე მეტად მტკენს გულს, ვიდრე სიტყვებით გადმოცემა შემიძლია. ძალიან ბევრს ვშრომობდი ისეთი გარემოს შესაქმნელად, რომელშიც მთავარი სიყვარული, პატივისცემა და მიმღებლობა იქნებოდა, სანაცვლოდ კი იმავეს ველი" — წერს პერის ჰილტონი ინსტაგრამზე.

პერის ჰილტონმა დედობის შესახებაც ისაუბრა და აღნიშნა, რომ ეს ყოველთვის მისი ოცნება იყო და სურს, კარგი დედა იყოს. "ჩემი შვილის ფოტო რომ არ გამოვაქვეყნო, ხალხი ჩათვლის, რომ კარგი დედა არ ვარ. თუმცა ფოტოს გამოქვეყნების შემდეგაც ადამიანები სისასტიკესა და სიძულვილს იჩენენ. მე კი ამაყი დედა ვარ, ჩემი შვილი სრულიად ჯანმრთელი და ძალიან საყვარელია", — დასძინა ჰილტონმა.

შეგახსენებთ, რომ პერის ჰილტონი და კარტერ რეუმი 2021 წელს დაქორწინდნენ. ცოტა ხნის შემდეგ კი, სუროგაციის გზით პირველი შვილი შეეძინათ. ფენიქსის დაბადებიდან 8 დღის შემდეგ პერის ჰილტონმა მისი და პატარას ხელების ფოტო ინსტაგრამზე გამოაქვეყნა და საზოგადოებას დედობის შესახებ ამცნო.