რა ხდება? სპეციალურმა საგამოძიებო სამსახურმა, მთავარი არხის თანამშრომლებისთვის პროფესიულ საქმიანობაში უკანონოდ ხელის შეშლის ფაქტზე, 2 პირი ამხილა.

რატომ არის მნიშვნელოვანი: ბოლო წლებში, ხელისუფლების მაღალჩინოსნები დამოუკიდებელი მედიის დისკრედიტაციას ცდილობენ. მედიის საკითხებზე მომუშავე ორგანიზაციები მიიჩნევენ, რომ მათი განცხადებები წაახალისებს ჟურნალისტებზე სიტყვიერ, თუ ფიზიკურ თავდასხმებს.

  • ავტორიტეტული საერთაშორისო ორგანიზაცია — რეპორტიორები საზღვრებს გარეშე (*RSF), წერს, რომ საქართველოში, დამოუკიდებელი და ოპოზიციური მედიისთვის, გარემო სულ უფრო მტრული ხდება.

რა მოხდა — დეტალები: საგამოძიებოს მიხედვით,

  • 2023 წლის 26 აგვისტოს, ტელეკომპანია მთავარი არხის ჟურნალისტი, ემა გოგოხია, და ოპერატორი — ნიკა გვალია, მესტიის რაიონის სოფელ ხაიშში მდებარე ხე-ტყის გადამამუშავებელი ერთ-ერთი საამქროს ტერიტორიაზე სიუჟეტის მოსამზადებლად იმყოფებოდნენ.
  • მათ, ბრალდებულები, სიცოცხლის მოსპობითა და ჯანმრთელობის დაზიანებით დაემუქრნენ.
  • ფიზიკურად იძალადეს ჟურნალისტზე.
  • ამით, ემა გოგოხიას და ნიკა გვალიას პროფესიული საქმიანობაში ხელი შეეშალათ.

რა ელით ჟურნალისტებზე მოძალადეებს: საგამოძიებო, ბრალდებულებებს ედავება:

  • 154-ე მუხლის მეორე ნაწილით — ეს არის ჩადენილი დანაშაული ძალადობის მუქარით, ან სამსახურებრივი მდგომარეობის გამოყენებით, და ისჯება ჯარიმით, ან ორ წლამდე თავისუფლების აღკვეთით;
  • 126-ე მუხლის პირველი ნაწილით — ეს არის ძალადობა, რამაც დაზარალებულის ფიზიკური ან ფსიქიკური ტანჯვა გამოიწვია და ისჯება თავისუფლების შეზღუდვით ორ წლამდე ვადით, ან თავისუფლების აღკვეთით ერთიდან სამ წლამდე ვადით.