ვენეციის მახლობლად ტურისტულმა ავტობუსმა გზის ბარიერი გაარღვია და დაახლოებით 15 მეტრის სიმაღლიდან გადავარდა. ავტოავარიის შედეგად 21 ადამიანი დაიღუპა, მათ შორის, 2 ბავშვი. ასევე, გარდაცვლილთა შორისაა ავტობუსის მძღოლი, 5 უკრაინისა და 1 გერმანიის მოქალაქე.

ავარია ვენეციის მახლობლად, მესტეს რაიონში, მოხდა. ავტობუსი ადგილობრივ ტურისტულ კომპანიას ეკუთვნოდა, შეჯახების დროს კი მას ტურისტები ვენეციის ისტორიული ცენტიდან სხვა რეგიონში გადაჰყავდა. გადავარდნიდან მალევე ავტობუსს ცეცხლი გაუჩნდა, ამ ეტაპზე დაშავებულთა რაოდენობა 18-ია.

ავტობუსის მძღოლი 40 წლის იტალიელი კაცი იყო, რომელიც ტურისტულ კომპანიაში 7 წელი მუშაობდა. ავარიის მიზეზი ამ ეტაპზე უცნობია, თუმცა ერთ-ერთი ვერსიით, მძღოლი მგზავრობისას შეუძლოდ გახდა.

ავტოავარიის ადგილას მისულმა მაშველებმა ავტობუსიდან 4 ადამიანი გამოიყვანეს და გადაირჩინეს. ავარიას ვენეციის მერი, ლუიჯი ბრუგნარო, გამოეხმაურა და მომხდარს უზარმაზარი ტრაგედია უწოდა.