რატომ არის მნიშვნელოვანი: ფინანსური დავალიანების გამო სტატუსშეჩერებული სტუდენტების პრობლემები წლებია განხილვის საგანია, როგორც პროფესიულ წრეებში, ასევე, ოპოზიციური პარტიების და უფლებადამცველების მიერ.

  • აქამდე მთავრობა ამ საკითხზე ქმედითი ნაბიჯების გადადგმისგან თავს იკავებდა.

სტრიქონებს შორის: პრემიერის ამ გადაწყვეტილების გაჟღერებას წინ უძღოდა სკანდალი, რომელიც მისი შვილის პენსილვანიის უნივერსიტეტში ჩასაყვანად სამთავრობო თვითმფრინავის გამოყენებას მოჰყვა.

  • ამავდროულად, ეს პირველ შემთხვევა არ არის, როდესაც მმართველი გუნდი დავალიანებას ანულებს ამომრჩევლის გულის მოსაგებად — რამდენიმე წლის წინ მოქალაქეებს წინასაარჩევნოდ ბანკის ვალებიც გაუნულდათ.
  • გარდა ამისა, აღსანიშნია სტუდენტების განსაკუთრებული როლი რუსული კანონის საწინააღმდეგო აქციების ორგანიზებაში — ამის გამო ჩნდება კითხვის ნიშნები, რომ ეს პარტიის ინტერესების გათვალისწინებით მიღებული გადაწყვეტილებაა.

დეტალები: მთავრობის სხდომაზე პრემიერმინისტრმა განაცხადა, რომ ყველასთვის ძალიან მნიშვნელოვანია სტუდენტების სწავლა-განათლება და უმაღლესი სასწავლებლების რეფორმა, რომელზეც ახალი მინისტრი მუშაობს.

  • მისივე თქმით, მინისტრისგან მოიკითხა ინფორმაცია და გაიგო, რომ დაახლოებით 30 000-მდე სტუდენტს ფინანსური დავალიანების გამო შეჩერებული აქვს სტატუსი.
  • აღნიშნა, რომ ეს დაახლოებით 40 მილიონი ლარის დავალიანებაა და მინისტრებს მუშაობა დაავალა.
  • ღარიბაშვილმა ხაზი გაუსვა, რომ "მისი გადაწყვეტილებით", ვისაც ფინანსური დავალიანების გამო შეჩერებული აქვს სტატუსი, გაუნულდებათ დავალიანება და შეეძლებათ, სურვილის შემთხვევაში აღადგინონ სტატუსი და გააგრძელონ სწავლა.
  • მსგავსი ტექსტი პრემიერმინისტრმა ფეისბუქზეც დაპოსტა და იქაც ხაზგასმულია, რომ გადაწყვეტილება მისია.
  • პოსტი იდენტურად გადააზიარა მთავრობის სტრატკომის ხელმძღვანელმა, ნინო გიორგობიანმა.
  • ამ ეტაპზე უცნობია, რა ვადებში განულდება დავალიანებები და შეძლებენ თუ არა სტატუსშეჩერებული სტუდენტები ამ სემესტრშივე სწავლის განახლებას.

განათლების სამინისტრომ ამ საკითზე დაპოსტა, თუმცა დამატებითი ინფორმაცია ფაქტობრივად არ გაუვრცელებია და იმას გაუსვა ხაზი, რომ ირაკლი ღარიბაშვილის გადაწყვეტილება "უპრეცენდენტოა".

  • მათივე ინფორმაციით, დავალიანება გაუნულდებათ კერძო უნივერსიტეტების სტუდენტებსაც.
  • "იმ უმაღლესი საგანმანათლებლო დაწესებულებებისთვის, რომლებიც სურვილს გამოთქვამენ და შეუერთდებიან სტუდენტებისთვის ამ უმნიშვნელოვანეს გადაწყვეტილებას. სამინისტროები შეიმუშავებენ საჭირო რეგულაციებს, რათა შეიქმნას შესაბამისი პირობები სტუდენტებისთვის დაგროვებული დავალიანების გასანულებლად", — ვკითხულობთ პოსტში.