რა მოხდა აქამდე: აგვისტოში საინფორმაციო სააგენტო cnews-მა გაავრცელა ფოტოები, რომლებიც ირაკლი ღარიბაშვილის აშშ-ში ყოფნისას, მანჰეტენზეა გადაღებული. მალევე გაირკვა, რომ ის აშშ-ში შვილთან ერთად გაფრინდა, რომელმაც პენსილვანიის უნივერსიტეტში ჩააბარა.

• მომხდარს საზოგადოებასა და პოლიტიკურ წრეებში უკმაყოფილება მოჰყვა —
• ღარიბაშვილს ორმაგ სტანდარტებში ადანაშაულებდნენ, ამბობდნენ, რომ ქვეყანა რუსული გზით მიჰყავს, თავად კი აშშ-ში ისვენებს.
• გაიჟღერა ბრალდებებმა მგზავრობის ხარჯების დაფინანსებასთან დაკავშირებითაც.
• მაშინ მთავრობის სტრატკომმა განაცხადა, რომ საზოგადოების შეცდომაში შეყვანის მიზნით ცრუ ინფორმაცია მიზანმიმართულად ვრცელდებოდა და პრემიერის აშშ-ში ჩაფრენის ხარჯები ბიუჯეტიდან არ გაწეულა.
• მოგვიანებით, TV პირველის გადაცემაში, ნოდარ მელაძის შაბათი, ჯორჯიან ეარვეისის ხელმძღვანელმა, თამაზ გაიაშვილმა თქვა, რომ აშშ-ში ჩასვლამდე ირაკლი ღარიბაშვილი გერმანიაში, მიუნხენში მისმა კომპანიამ სამთავრობო თვითმფრინავით წაიყვანა.
• კითხვაზე, თუ რა დაჯდა ეს მომსახურება, ჯორჯიან ეარვეისის ხელმძღვანელმა თქვა, რომ მთავრობა იხდის და მან არ იცის.
• ამ საკითხზე სახელისუფლებო მედიებთან საუბრისას სახელმწიფო დაცვის სპეციალური სამსახურის უფროსი, ანზორ ჩუბინიძე ამტკიცებდა, რომ თბილისი-მიუნხენი-თბილისის რეისზე თანხა საბიუჯეტო სახსრებიდან არ დახარჯულა.
• მისი თქმით, საჭირო თანხა, 34 000 ლარი, ირაკლი ღარიბაშვილის მამამ, ტარიელ ღარიბაშვილმა გადაიხადა.

რა ხდება ახლა: მას შემდეგ, რაც პრემიერის ვიზიტები და პირადი მიზნებისთვის თვითმფრინავის გამოყენება განხილვისა და კრიტიკის საგანი გახდა, ქართულმა ოცნებამ ტრადიციულ ხერხს მიმართა და ოპოზიციის, კერძოდ, წინა ხელისუფლების გადადგმულ ნაბიჯებზე აპელირება დაიწყო.

• შესაბამისად, თავდაცვის სამინისტრო ამ გადაწყვეტილებას "საზოგადოების მაღალი ინტერესით" ხსნის და ამბობს, რომ საქართველოს ყოფილი პრეზიდენტის, მიხეილ სააკაშვილის, საჰაერო ხომალდებით მგზავრობასთან დაკავშირებით დადებული ხელშეკრულებების განსაიდუმლოების პროცესი დაიწყეს.
• "პროცესი ხორციელდება უწყებაში შესაბამისი კომისიის მიერ, კანონმდებლობის შესაბამისად. მოცემული განსაიდუმლოება შეეხება 2010, 2011 და 2012 წლებში თავდაცვის სამინისტროსა და შპს ჯორჯიან ეარვეისს შორის დადებულ ხელშეკრულებებს", — აცხადებს უწყება.
• მათივე ინფორმაციით, მინისტრის 2012 წლის შესაბამისი ბრძანების საფუძველზე უკვე განსაიდუმლოებულია საქართველოს თავდაცვის სამინისტროს შპს ჯორჯიან ეარვეისთან გაფორმებული ორი ხელშეკრულება.
• "აღნიშნული ხელშეკრულებების მომსახურების მიზნით თავდაცვის სამინისტროს ბიუჯეტიდან 14 მილიონ ლარამდეა გადახდილი", — ვკითხულობთ უწყების განცხადებაში.