ახლახან მიშკოლცის საერთაშორისო კინოფესტივალი ჩატარდა, სადაც ელენე ნავერიანის შაშვი შაშვი მაყვალი 3 პრიზის მფლობელი გახდა. ფილმმა ფესტივალის მთავარი ჯილდო — Emeric Pressburger Prize მოიპოვა. ჯილდო ფილმის კინემატოგრაფმა აგნეს პაკოზდიმ, რომელიც კინოფესტივალს ესწრებოდა, პირადად მიიღო.

მიშკოლცის კინოფესტივალის ჟიურის განცხადებით, რომელსაც ცნობილი მსახიობი და რეჟისორი ჟან-მარკ ბარი ხელმძღვანელობდა, ელენე ნავერიანის ნამუშევარი განსაკუთრებული სიცხადით, ჰუმანურობითა და თხრობის სტილით გამოირჩევა. ჟიურიმ ფილმს შესანიშნავი რეჟისორული და კინემატოგრაფიული ნამუშევარი უწოდა და მსახიობ ეკატერინე ჩავლეიშვილის დასამახსოვრებელ შესრულებასაც ხაზი გაუსვა.

გარდა ამისა, მიშკოლცის კინოფესტივალზე ელენე ნავერიანმა CICAE-ის (International Association of Art Cinemas) ჟიურის პრიზი მოიპოვა. რეჟისორმა ასევე მიიღო FIPRESCI-ის (International Federation of Film Critics) ჟიურის ჯილდო საუკეთესო საერთაშორისო ფილმის კატეგორიაში.

შეგახსენებთ, რომ ცოტა ხნის წინ ერთ-ერთ ყველაზე პრესტიჟულ ევროპულ კინოდაჯილდოებაზე, სარაევოს კინოფესტივალზე, ელენე ნავერიანის შაშვი შაშვი მაყვალი საუკეთესო სრულმეტრაჟიან ფილმად დასახელდა. აღსანიშნავია, რომ ფესტივალის პრიზის — "სარაევოს გულის" — მფლობელი ასევე გახდა ნავერიანის ფილმში მთავარი როლის შემსრულებელი ეკატერინე ჩავლეიშვილი, რომელიც საუკეთესო მსახიობ ქალად დაასახელეს. ელენე ნავერიანის რიგით მესამე სრულმეტრაჟიანი ფილმი შაშვი შაშვი მაყვალი თამთა მელაშვილის ამავე სახელწოდების რომანის მიხედვითაა გადაღებული.