რა მოხდა: 22 აგვისტოს ტელეკომპანია რუსთავი 2-მა გაავრცელა ინფორმაცია, რომ დედამიწის შემსწავლელ მეცნიერებათა ინსტიტუტისა და სეისმური მონიტორინგის ცენტრის დირექტორი, თეა გოდოლაძე ოჯახში ძალადობაშია ბრალდებული.

• მედიასაშუალება წერდა, რომ კურიერმა ექსკლუზივი მოიპოვა.
• გამოქვეყნებულ მასალაში არ ჩანს არც ინფორმაციის წყარო და არც თავად გოდოლაძის პოზიცია.

მოგვიანებით, რუსთავი 2 სეისმური მონიტორინგის ცენტრის ხელმძღვანელსაც დაუკავშირდა.

• გოდოლაძემ კურიერთან თქვა, რომ ძალადობის მსხვერპლი თავად იყო, დეტალურ ინფორმაციას კი ადვოკატებთან საუბრის შემდეგ გაასაჯაროებდა.
• "იყო ჩემზე ძალადობა და შეტრიალებული თემაა. როგორ გგონიათ, 17 წლის ბიჭს მე ვცემდი, თუ როგორ არის საქმე? თუ პირიქით არის და პროკურატურა პირიქით მედავება, რაც აბსოლუტურად ცხადია. როგორ ფიქრობთ, მე მოვერეოდი მამა-შვილს?" — ამბობდა ის.

საფარის განცხადებით, გოდოლაძის წინააღმდეგ აგორებული შავი კამპანია პროფესიონალი ქალის რეპუტაციის შელახვისა და მისი გაჩუმების მცდელობაა.

• ორგანიზაციაში, რომელიც გოდოლაძის ინტერესებს წელიწადზე მეტია იცავს, ამბობენ, რომ ის თავად იყო პარტნიორის მხრიდან ფიზიკური ძალადობის მსხვერპლი და დაზარალებულის სტატუსი აქვს.
• "ბრალდებულ კაცს 15 000-ლარიანი გირაო აქვს შეფარდებული. ამ საქმის განხილვას სასამართლო მალე დაასრულებს", — წერს საფარი.
• მათივე ინფორმაციით, შურისძიებისა და ზეწოლის მიზნით მოძალადემ თავად დაადანაშაულა დაზარალებულ ქალი ძალადობაში, თუმცა გოდოლაძის წინააღმდეგ გამოცემული შემაკავებელი ორდერი სასამართლომ გააუქმა.
• "ამის მიუხედავად, პროკურატურამ მას მაინც, სრულიად უსაფუძვლოდ, წარუდგინა ბრალი. აღსანიშნავია, რომ მოძალადეების მხრიდან მსხვერპლი ქალის დადანაშაულება, სამწუხაროდ, დამკვიდრებული პრაქტიკაა", — აცხადებენ ორგანიზაციაში.

საფარი მოუწოდებს საზოგადოებას, მედიასა და პოლიტიკოსებს, თავი შეიკავონ ინფორმაციის დამახინჯებულად და ცალმხრივად გავრცელებისგან.

• ამბობენ, რომ ამ საქმის გახმაურება არის საზოგადოების ყურადღების გადატანის მცდელობა გოდოლაძის პროფესიული საქმიანობიდან მისი პირადი ცხოვრებისკენ.
• "აგორებული შავი კამპანიის მიზანია, გააჩუმონ პროფესიონალი, რომელიც ყოველთვის ღიად და აქტიურად აფიქსირებს თავის კრიტიკულ მოსაზრებებს ეკოლოგიისა თუ განაშენიანების საკითხებზე. ის აქამდეც არაერთხელ გამხდარა ვერბალური თავდასხმის ობიექტი, მათ შორის, ხელისუფლების წარმომადგენლებისგან".

კონტექსტი: სეისმოლოგი თეა გოდოლაძე ხშირად აკრიტიკებს ხელისუფლებას სხვადასხვა ტერიტორიის უკანონო თუ შეუსაბამო განაშენიანების გამო.

• 3 აგვისტოს, რაჭაში, შოვში, მომხდარი სტიქიის შემდეგ გოდოლაძე აქტიურად საუბრობდა გადაწყვეტილების მიმღები პირების პასუხისმგებლობასა და მონიტორინგის სისტემების არსებობის საჭიროებაზე.
• მალევე ქართულმა ოცნებამ მისი დისკრედიტაციის კამპანია წამოიწყო.
• "საქართველოში გვყავს ერთი-ორი გეოლოგი, თუ ვინც არის პროფესიით, არ ვიცი, ვინც იმ დღეებში ტელევიზორში ჩანდა, განსაკუთრებით, ერთი ქალბატონი, გვყავს ერთი-ორი ასეთი ადამიანი, რომელიც კრიზისის დროს პანიკას ტეხს აბსოლუტური ტყუილით", — ამბობდა პარლამენტის თავმჯდომარე, შალვა პაპუაშვილი მასზე.