დივიდენდის შესახებ ალბათ ყველა დამწყებ ინვესტორს სმენია, თუმცა მასთან დაკავშირებული ბევრი დეტალი ზედაპირზე სულაც არ დევს და სიღრმისეულ კვლევას მოითხოვს.

მარტივად რომ ვთქვათ, დივიდენდი ის შემოსავალია, რომელსაც აქციონერი კომპანიისგან იღებს. დივიდენდის გადამხდელ კომპანიებს შესაბამისი განაკვეთი აქვთ, რომლის მიხედვითაც ეს გადასახადი ანგარიშდება. მაგალითად, მარტივი არითმეტიკით, თუ კომპანია, რომლის ფასიან ქაღალდებსაც ფლობ თითო აქციაზე 0,5 დოლარს იხდის, 1 000 ცალი აქციის ფლობის შემთხვევაში, შესაბამის პერიოდში, მისგან 500 დოლარს მიიღებ.

როგორც წესი, კომპანია დივიდენდს მოგების დაფიქსირების შემთხვევაში გასცემს. თუმცა, დივიდენდის გადახდა სავალდებულო არ არის. ამის მიუხედავად, როგორც სტატისტიკა აჩვენებს, კომპანიების 84%-მდე დივიდენდს დროდადრო მაინც გასცემენ.

აქვე უნდა ითქვას ისიც, რომ დივიდენდის გაცემის იურიდიულად სავალდებულო თარიღი არ არსებობს. თუმცა, არსებობენ ეგრეთ წოდებული დივიდენდის არისტოკრატი კომპანიები, რომლებიც ამას რეგულარულად აკეთებენ. როგორც წესი, ისინი ამ გადასახადს კვარტალურად იხდიან.

მნიშვნელოვანია, რომ საინვესტიციო გადაწყვეტილების მიღებამდე გაითვალისწინო, რამდენია კომპანიის დივიდენდის განაკვეთი, ანუ სარგებელი. ეს არის ის თანხა, რომელსაც კომპანია იხდის თითო აქციის სანაცვლოდ. მაგალითად, თუ კომპანიის ერთი აქცია 100 დოლარი ღირს და ის წლიურად დივიდენდის სახით 5 დოლარს გასცემს, მაშინ დივიდენდის შემოსავლიანობა არის: 5/100=0,05 — ეს 5%-იან სარგებელს ნიშნავს.

თუ დივიდენდის გადამხდელ კომპანიებში ინვესტირება გსურს, ამ სტატიის მომდევნო ნაწილში რამდენიმე რჩევას გაგიზიარებთ:

დაიწყე ინფორმაციის შეგროვებით

ყოველთვის უნდა გახსოვდეს, რომ ინვესტირებაში კვლევა ძალიან მნიშვნელოვანია. მოძებნე ისეთი აქციები, რომლებიც საიმედოდ იხდიან დივიდენდებს. გაითვალისწინე, ყველა კომპანია არ გასცემს დივიდენდს და ამასთან, მათგან ყველა არ არის თანმიმდევრული.

ამიტომ, შეამოწმე, აქვს თუ არა კომპანიას რეგულარული გადახდების ისტორია და მხოლოდ ამის შემდეგ მიიღე გადაწყვეტილება. ბუნებრივია, რაც უფრო თანმიმდევრული იყო კომპანია წარსულში, მით უფრო სავარაუდოა, რომ ის მომავალშიც ასეთ გზას გააგრძელებს.

დაიწყე მსხვილ კომპანიებში ინვესტირებით

თუ დამწყები ინვესტორი ხარ, უმჯობესია იმ კომპანიებით დაიწყო, რომელთა შესახებაც მეტი ინფორმაცია გაქვს და რომლებმაც უკვე მიაღწიეს დიდ ზრდას. როგორც წესი, სწორედ ასეთი კომპანიები არიან სანდო და მაღალი დივიდენდის გადამხდელები.

ამასთან, შეგიძლია შენი ფინანსები ETF-ებში დააბანდო. ასეთ ფონდებს აქციების კრებულსაც უწოდებენ, რომლებიც სხვადასხვა კომპანიას აერთიანებენ და ფასიანი ქაღალდების ერთგვარ კოქტეილს გთავაზობენ.

მოძებნე მაღალი და მდგრადი შემოსავლის მქონე აქციები

როდესაც კომპანიის დივიდენდის განაკვეთის შესახებ ინფორმაციას მოიძიებ, ორი საკითხი გაითვალისწინე: მაღალი შემოსავლის მიღების შესაძლებლობა და მისი სიმდგრადე.

თუ ერთი კომპანიის დივიდენდის განაკვეთი 3%-ია ხოლო მეორის — 1,5%, ბუნებრივია, რომ არჩევანს მაღალი შემოსავლის სასარგებლოდ გააკეთებ. თუმცა, ზოგიერთ შემთხვევაში მაღალი განაკვეთი განპირობებულია ქციების ფასის უეცარი ვარდნით. ეს მაშინ ხდება, როდესაც კომპანია საკუთარ ფინანსებს არასწორად განკარგავს და აქციონერებზე საჭიროზე მეტს ანაწილებს. ასეთ დროს, სავარაუდოა, რომ მის მიერ გადახდილი დივიდენდი არ იქნება მდგრადი.

ამასთან, გაითვალისწინეთ ზოგადი სტატისტიკა. მაგალითად, ბოლო პერიოდისთვის დივიდენდის საშუალო შემოსავალი 2%-ის ფარგლებში მერყეობდა. თუ ბაზარზე შეხვდებით კომპანიას, რომელიც წლიურად 3-3,5%-ს გადაგიხდით, ეს შესაძლებელია ჯდებოდეს გონივრულ ზღვარში, თუმცა თუ კომპანია 5%-იან დივიდენდს გთავაზობს, მის მაჩვენებლებში უფრო ღრმად უნდა ჩაიხედო და მისი ფინანსები ზედმიწევნით კარგად შეისწავლო.

არ დაგავიწყდეს, ნებისმიერი საინვესტიციო გადაწყვეტილების მიღებამდე რეკომენდირებულია სიღრმისეული კვლევის ჩატარება.

აქციებით ვაჭრობა ახლა უკვე საქართველოს ბანკის მობილბანკით არის შესაძლებელი. ესტუმრე მობილბანკს, რომლის საშუალებითაც ისეთი საერთაშორისო კომპანიების ფასიანი ქაღალდებით ვაჭრობას შეძლებ, როგორებიცაა: Apple, Amazon, Microsoft, Tesla, Google და სხვა. ეს სიახლე საქართველოს ბანკმა მისი ჯგუფის შვილობილი კომპანიის, Galt & Taggart-ისა და საერთაშორისო ფინანსური ტექნოლოგიების პლატფორმა DriveWealth-ის პარტნიორობით დანერგა. თუ გსურს მეტი გაიგო ინვესტიციების შესახებ, ესტუმრე ფეისბუქგვერდს — ინვესტიციები, სადაც გაიგებ მეტს, თუ როგორ ივაჭრო აქციებით.

ვაჭრობა/ინვესტირება დაკავშირებულია მაღალ რისკებთან და იმ შემთხვევაშიც კი, თუ რეკომენდაციების შესაბამისად არის განხორციელებული, შესაძლოა გამოიწვიოს არსებითი დანაკარგები, ისევე, როგორც მოგება. თქვენ დეტალურად უნდა გააანალიზოთ, რამდენად მისაღებია თქვენთვის ვაჭრობა/ინვესტირება თქვენი ფინანსური მდგომარეობის გათვალისწინებით და შეგიძლიათ თუ არა გასწიოთ თანხის დაკარგვის რისკი.