დეტალები: დღეს ერთ-ერთი პირველი უკრაინა იყო, რომელიც 2008 წლის აგვისტოს ომის 15 წლის თავს გამოეხმაურა. ქვეყნის საგარეო საქმეთა უწყებამ Twitter-ზე პოსტი გამოაქვეყნა.

  • მათ კიდევ ერთხელ დაადასტურეს საქართველოს სუვერენიტეტისა და ტერიტორიული მთლიანობის მიმართ მხარდაჭერა.
  • "15 წლის წინ რუსეთი შეიჭრა საქართველოში. საქართველოს რეგიონები, აფხაზეთი და ცხინვალის რეგიონი/სამხრეთ ოსეთი კვლავ ოკუპირებულია რუსეთის ჯარის მიერ. უკრაინა ქართველი ხალხის გვერდით დგას", — ვკითხულობთ პოსტში.
  • განცხადებასთან ერთად, აგვისტოს ომთან დაკავშირებული ვიდეო გამოაქვეყნა აშშ-ის საელჩომ და დაწერა, რომ დღევანდელი დღე შოვის ტრაგედიის გამო ორმაგად მძიმეა.
  • "რუსეთის საქართველოში შემოჭრის 15 წლისთავი ორმაგად მძიმეა დღეს. პატივს მივაგებთ დაღუპულთა ხსოვნას და ვიხსენებთ გმირებს, რომელთა სახელიც სიმტკიცეს მატებს ქართველ ხალხს. შოვის ტრაგედიის მსხვერპლთა გლოვის ნიშნად დღეს შეერთებული შტატების დროშა დაშვებულია".

სხვა გამოხმაურებები: ევროპული საბჭოს პრეზიდენტმა, შარლ მიშელმა Twitter-ზე დაწერა, რომ 15 წლის შემდეგ საქართველოს ტერიტორიული მთლიანობისა და სუვერენიტეტისადმი ევროკავშირის მხარდაჭერა ურყევი რჩება.

  • "ჩვენ ვდგავართ საქართველოს მამაცი ხალხის გვერდით, რომელმაც ევროკავშირისა და NATO-ს გზა აირჩია".
  • დაპოსტა ესტონეთის პრემიერმაც — მისი თქმით, 15 წლის შემდეგ საქართველოს ტერიტორიის 20% კვლავ ოკუპირებულია, სისასტიკე და საერთაშორისო სამართლის დარღვევა კი ისევ გრძელდება.
  • "ჩვენ უნდა დავასრულოთ რუსეთის აგრესიის ციკლი. ესტონეთი აგრძელებს საქართველოს ტერიტორიული მთლიანობის მხარდაჭერას".
  • ლიეტუვის პრეზიდენტმა, გიტანას ნაუსესამ კი კიდევ ერთხელ დაგმო საქართველოს ტერიტორიების რუსეთის მიერ ოკუპაციას და აღნიშნა, რომ ყოველთვის უჭერდნენ მხარს ქვეყნის სუვერენიტეტს.
  • "დღეს უკრაინა იცავს საკუთარ თავისუფლებას იგივე აგრესორისგან. მოვუწოდებთ რუსეთს, გაიყვანოს ძალები საქართველოსა და უკრაინის ტერიტორიებიდან".