ბრიტანელი კინოვარსკვლავი ჯუდი დენჩი ჯანმრთელობის გაუარესებულ მდგომარეობაზე საუბრობს. ოსკაროსანი მსახიობის თქმით, უკვე ვეღარც გადაღებებზე ხედავს და ვერც სცენარს კითხულობს, ამან კი მისი ცხოვრების სტილი, რა თქმა უნდა, დიდად შეცვალა.

"გადასაღებ მოედანზე უკვე ვეღარ ვხედავ", — ჰყვება 88 წლის დენჩი, — "და ვერც ვკითხულობ. ყოველ შემთხვევაში, ბევრს ვერაფერს ვხედავ. ამასთან გამკლავებას ვცდილობ, მაგრამ თუ მოზრდილი ტექსტი მაქვს [სასწავლი], საქმე უფრო რთულადაა ხოლმე, მე კი სათანადო გზა ჯერ არ მიპოვია. უამრავი მეგობარი მყავს, ვინც სცენარს მასწავლის, თუმცა, მე ფოტოგრაფიული მეხსიერება მაქვს".

თავისი თაობის ერთ-ერთ საუკეთესო მსახიობად მიჩნეულმა დენჩმა ჯერ კიდევ 2012 წელს განაცხადა, რომ მაკულის ასაკობრივი დეგენერაციის დიაგნოზი დაუსვეს, რის გამოც მისი მხედველობა უარესდებოდა. ამის მიუხედავად, მსახიობს კარიერისთვის თავი არ დაუნებებია და მეტი შემართებით განაგრძო საქმიანობა. დენჩის თქმით, ცდილობს, ყოველი დღე შინაარსიანად გაატაროს.

"მოწყენილობის ირაციონალური შიში მაქვს", — ამბობს მსახიობი, — "აი, ზუსტად ამიტომ გავიკეთე ტატუ-წარწერა Carpe diem (ლათ. "მოწყვიტე დღე"). ჩვენ ასე უნდა ვიცხოვროთ".

დენჩმა ტატუ რამდენიმე წლის წინ, თავის 81-ე დაბადების დღეზე გაიკეთა. მალევე კი, 85 წლის ასაკში, ყველაზე ხნიერი ადამიანიც გახდა, რომელიც ბრიტანული Vogue-ის გარეკანზე გამოჩნდა.

ჯუდი დენჩის სამსახიობო კარიერა ექვს ათწლეულს, უამრავ ფილმს, სატელევიზიო სერიალსა და სპექტაკლს მოიცავს. ოსკარის გარდა, მსახიობს მიღებული აქვს ორი ოქროს გლობუსი, ბრიტანული კინოაკადემიის ათი ჯილდო და კიდევ არაერთი სხვა პრიზი.