ამერიკის კინემატოგრაფიული ხელოვნებისა და მეცნიერების აკადემიის ამჟამინდელ პრეზიდენტ შერილ ბუნ აიზეკსს, რომელიც 2013 წელს აირჩიეს, უფლებამოსილება ივლისში ეწურება. აკადემიის წევრებს კი ახალი ლიდერის არჩევა მოუწევთ.

როგორც გამოცემა Variety წერს პრეზიდენტობის სურვილი რამდენიმე გავლენიანმა მსახიობმა უკვე გამოთქვა, მათ შორის არის ლორა დერნიც.

როგორ წყარომ გამოცემას აცნობა, აკადემიაში არჩევნებისთვის მზადება ივლისის ბოლოსკენ დაიწყება, დერნი კი, რომელიც ჰოლივუდის ე.წ. "სამეფო ოჯახის" წევრია და A კლასის ვარსკვლავად ითვლება, აპირებს, ბეტ დეივისის, ფეი კანისა და აიზეკსის შემდეგ გახდეს მეოთხე ქალი, რომელიც 90 წლის წინ შექმნილ, კინოინდუსტრიის ყველაზე გავლენიან აკადემიას უხელმძღვანელებს.

ამ თემასთან დაკავშირებით დერნს ჯერ-ჯერობით კომენტარი არ გაუკეთებია.

ამერიკის კინოაკადემიამ რამდენიმე დღის წინ 774 ახალი წევრი დაიმატა, მათ შორის არიან: აიშვარია რაი, მონიკა ბელუჩი, ამანდა სეიფრიდი, ემი პოლერი, კრის ჰემსვორტი, კრის პრატი, დუეინ ჯონსონი, ედგარ რამირესი, კრისტენ სტიუარტი, რუთ ნეგა, სარა პოლსონი, ვიგო მორტენსენი, ზაქარი ქუინტო, ადამ დრაივერი, კრის ევანსი, ფან ბინგბინგი, გალ გადოტი, შარლოტა გინსბურგი, რუპერტ გრინტი, ნაომი ჰარისი, ნიკ კეივი და სხვები.

ამერიკის კინემატოგრაფიული ხელოვნებისა და მეცნიერების აკადემია, რომელიც კინოს ყველაზე პრესტიჟულ ჯილდოს ოსკარს გასცემს, 8 ათასზე მეტი წევრი ჰყავს, რომელთა უმეტესობა აშშ-ში მოღვაწეობს.